Wednesday, November 19, 2008

عاااااااااااااايزة ارغى+تحديث2

Wednesday, November 19, 2008
تحديث : 2 انا غيرت شكل المدونة تانى اهوا علشان الاولنى مكنش مظبط والصور كانت تحت ماما مى طبعا هى الى عملت الشكل دة احنا كنا حافظينوا ادعولها بقى ربنا يسعدها ويشفيها ويعدى الازمة الى هى فيها على خير وترجعلنا بسرعة
اولا: تحذير هام قبل ماتشوف البوست دة البوست دة هيبقى رغى على الفاضى وتضيع وقت للى هيقرا يعنى
لو وراكم غسيل وراكم خناقة هتشوفه مسلسل كدة يعنى روحوا احسن عموما انا حذرت وخلاص
من يومين كدة وانا عايزة ارغى واكلم عن نفسى مع انى مش بحب اكلم عن نفسى خالص مع حد بس طقت فى دماغى اكلم مع مدونتى وكمان شكلها الجديد يفتح النفس ان الواحد يرغى ويكلم كتير اوى هحل تاجات دى الطريقة الوحيدة الى الواحد يرغى من خلالها ويشوف شخصيتة برضة بس قبل ما احل هكلم عن النيو لوك شوية اية رايكم فى شكل المدونة الجديد؟ماما مى حبيبة الروح هى الى عملتوة ليه دة انا طلعت عينها والله قاعدنا يجى6 ساعات انا طبعا قاعدة هانم الى بعملوة بس اقول لا الشكل دة وحش لاالشكل دة بيبصلى من فوق لتحت الشكل دة مش مستريحلوة كانت رحلة بحث طويلة اوى علشان تليق مع شخصية كيكى الى فى مدونة لحد مالقينا الشكل الى انتوا شايفنوا دة بش مشكلة الشكل دة انى مينفعش احط الصور الى تحت دى فوق علشان الصفحة هتبقى بيضا خالص لحد ماتخلص من الصور وتشوف البوست يلا معلش...الاهم ياماما والله انا مش عارفة اقولك اية حد غيرك والله كان قتلنى وخسرنى فى موضوع المدونة دى وعلى الى عملتوة فيكى...اة صحيح بتسالوة لية بقولها ماما امممممممم اصل دة زر بينى وبينها بقى نسيت كمان اقولكم انى شوفتها وكان حتة يوم كنت عايزة اكتب عنة بس انا مكنتش هنا ماما اخر حاجة هقولك ليكى ست الحبايب يا حبيبة يا حنينة وكلك طيبة يارب يخليكى يا امى...خلينى بقى اخرج مع ابن الجيران عااااااااااا
************************************************

احل التاجات بقى
***************
اول سؤال من انت؟
مش عارفة لية اول ماشوفت السوال ضحكت وقولت انت عبيط يا اسطى عموما انا واحدة اسمها كيكى عادية جداا جدا بختصار شديد ساعات بكره وساعات احب وساعات استندل وساعات استجدع ساعات ببقى غبية وساعات ابقى زكية الخ الخ.. كمان مش بتحب حد يقولها ولا كوكى ولاكوكا ولا اى اسم دلع غير كيكى
تانى سؤال: بطاقتى الشخصية
الاسم :كيكى بنت ام كيكى
العمر: دايما بشوفة سوال ملهوش لازمة لان مهما البنى ادام الى قصادك كبير صغير مش بتفرق معايا الاهم ان يكون دماغ
الديانة: مسلمة الحمد الله
الحالة الاجتماعيه:مستنية الفرج هههههه حلوة دى
أذكر خمس أحلام على الاقل .. تخص ماضيك وتحلم فيها بتغيير اشياء .. ماذا ستعدل وماذا ستترك؟
كان نفسى اوى زمان ابقى صحفية واخش اعلام
نفسى اتعلم رسم ومازلت
عايزة اطير بس عارفين ازاى تطيروا وانتوا على الارض ارقصوا اة والله انا كان نفسى اتعلم الرقص الغجرى علشان اطير من خلاله
او عارفين ازاى كمان الى صوتوا حلو يقدر برضة يطير من خلال صوتوا..حد فاهمنى
هعدل اية بقى واغير اية.. مش هغير حاجة منهم بس ياريت لو اغير نفسى لانى محقتقش منهم اى حاجة ساعات احلامى بتصعب علية لانى معملتش ليها اى حاجة..انا اسفة
اذكر خمس أحلام على الأقل تخص مستقبلك ؟
اتخصص واروح ورش للكتابة يمكن اكون فى يوم من الايام بكتب ساخر حلو وابقى كاتبة كدة زى يوسف معاطى او لينين الرملى
الم نفسى شوية بقى فى حكاية رجيم المراجيح الى بعملوة دة واركز كدة علشان اخس خلاص يخرب بيتك قربتى تبقى مقطورة بشرية
انمى تفكيرى وارائى من خلال الكتب وحاجات علمية كتير
اروح الكورسات بتاعت ابراهيم الفقى لتنمية البشرية محتاجة حاجة زى كدة اوى
اتعلم لغات كتير بالذات الاول الانجليزى علشان بجد نسيتوة وفقد الذاكرة فى وقفت لحد هاى وباى
أذكر شخصين على الأقل متواجدين فى حياتك حاليا .. كنت تود وجودهم قبل الآن بزمن ..
مدونتى وانتوا
السؤال الرابع أذكر شخصين على الأقل غير متواجدين فى حياتك حاليا كنت تود وجودهم الان
مفيش
مين اقرب شخص ليك؟
سارة بنت خالتى وامنية صاحبتى وعلى فكرة فى ناس منكم بقت قريبة منى اوى من غير ذكراسامى
ايه معنى السعادة من وجهة نظرك وحاسس انك سعيد؟
السعادة هى سعاد الاخرين وليس فى اسعاد الذات
بصوا من ناحية حاسة انى سعيدة او لا فهو الموضوع نسبى ساعات يحصل موقف حلو افتكر كل الحاجات الحلوة الى فى حياتى واحس انى سعيدة وساعات العكس افتكر كل الحاجات الى وحشة فى حياتى واحس انى غير سعيدة اةةةةة عموما الحمد الله
امتى حسيت انك ظلمت انسان ومحتاج لحظة غفران؟
والله معرفش ظلمت حد او لا بس اكيد ظلمت مش عارفة عموما انا اسفة ومش هعمل كدة تانى
البنى ادم اكيد فى كل وقت محتاج لحظة غفران من كل الى حواليه
بتعمل ايه لما بتكون متضايق؟
بعمل حاجة غريبة اوى اجيب كل لبس الخروج واقعد البس واقلع فى واحط مكياج وارقص بستريح نفسينا لمة بعمل اوى كدة
او اعيط بحرقة
امتى حسيت انك اتظلمت وليه؟
ماعلينا
ايه اكتر احساس بيراودك تجاه نفسك والاخرين؟
انا دايما لوحدى ومع نفسى
تجاة الناس عموما كل الناس طيبين عارفة اكيد فى نماذج مش كويسة بس فى حاجة فى كل بنى ادام لو لمستها من جوه هتلاقى طيب اوى
امتى ممكن تتنازل عن حق من حقوقك و ليه؟
يعنى لو الى قصادى محتاج الحاجة دى اكتر منى مش شرط احبه او اكره
أذكر سته اشياء لايكتشفها فيك من يراك لاول مرة؟
احيانا بكون جادة جدااااااااااااا
انا مش اجتماعية خالص زى مانتوا فاكرين
انطوئية لحد ما
قليلة الكلام
هادية اوى اوى محدش مصدق دى انا عارفة
دمى تقيل وكوبة انا بت رخمة اساسا مش بهزر غير مع ناس القريبن منى اوى
لدغة فى سين فى اة بيكشتوفنى من اول كلمة وفى مش بيعرفوة الابعد سنين انا الى مضايقنى فى الموضوع دة انى محروم اغنى اغنية المفضلة بسبوسة بسبوسة
من لاخر كدة انا معاكم والله ببقى حد تااااااانى خالص بتعفرت معاكم
سبع حاجات دايما بقولهم
انا زهقت دايما بزهق كدة وملولة محدش يزعل منى بقى لو قلت كدة
ارد اقول اية
اية الى يضحك دلوقتى
بطل
كدابة
ان شاء الله لمة احب اخد الى قصادى على قد عقلوا اوسكتوا علشان زهقت
يارب ارحمنى
سبع حاجات نفسى اعملهم
اخد بطوبطى من ماما مى واقضى مع يوم يالهوى يا بطبوطى دة انا بحبك اوى
انط فى اى قطر واروح لانجى فى اسكندرية وامسك ايدها ونطير سوا ونعمل كل شئ اتفقنا علية
اخر حاجة بقى علشان انا زهقت وكرهت نفسى
نفسى اعمل حاجات كتير لناس كتير واحقق احلامهم واساعدهم
انا اسفة انى مش بنى ادمة مفيدة ومش عارفة اعملكم حاجة بجد اسفة

Sunday, November 9, 2008

قسم يا عمدة قسم بس من غير صداع

Sunday, November 9, 2008
فى مكان ما فى البيت(والى ميعرفش فين البيت الابيض بالتحديدهو وراء البنزينة"

ميشال مرات اوباما وهنسميها شوشو علشان التموية وهنسمى اوباما بوبو برضة علشان التموية

شوشو:قوم ياراجل يلا من صباحية ربنا وانت نايم كدة لا شغلة ولا مشغلة ولا كانك بقيت ريس على دولة دة انت لو كنت ريس وكالة البلح كنت بقيت انشط من كدة

بوبو:فى اية بس ياشوشو كنت سيبينى انام شوية دة الواحد بقالة زمن منمش على فرشة حلوة زى دى وكمان اقوم اعمل اية بس

شوشو:ياراجل هو السبرتو الى بتشربوا لحس دماغك ولا اية انت ناسى انك بقيت ريس اكبر دولة فى العالم ولازم تخطط وتقسم هنعمل اية شوف هنحارب مين..وهنخرب على مين...وهنسرق مين...وهنقول على مين عندة اسلحة دمار شامل المرة دى...ومين حبايبنا ومين اعدائنا ومين ومين

بوبو:يااااااااة تصدقى بالله وما ليكى عليه حلفان انى كنت ناسى الموضوع دة والفرشة الجديدة نسيتنى مانتى عارفة انا لمة بغير فرشتى بيحصل اية والله مش عارف من غيرك كنت عملت اية ياقمر انت يا قمر

شوشو:اية ياخويا كلنى بالكلام كلنى وانسى الى عملتوا فى انت وامك لمة كنا ساكنين فى المستودع والله دة انا لوحدة غيرى ماكنت استحملت الى استحملتوا ابداا وادينى استحملت معاك اهوا ونضفتك لحد ما خليتك اكبر ريس فيكى يا منطقة

بوبو:ياااااة دة انتى قلبك اسود بشكل يا ولية انتى

شوشو: يلا اهو كلوا بيعمل بأصلوا المهم..رئيسة الوزراء الاسرائلية اديتك مسد كول المعفنة مش هاين عليها تتصل اوتبعت ماسج كلمنى شكرا تلاقيها عايزة نبعتلها كام دبابة على كام طيارة على كام مطوى قرن غزال للسفاحين الفلسطينين الى مش مكفيهم انهم واكلين شرابين نايمين مدبحوين ومقتلوين فى ارض مش ارضهم مش عارفة انا يا خويا قلة الادب والذوق دى

بوبو:اة والله عندك حق ياشوشو انا لاعمرى هشوف قلة ادب زى دى ولاهشوف انا لازم اشوف حل معاهم كويس يردعهم عن اصحابنا الاسرائيلين

شوشو:لا وشوف بجاحة العالم مستخصرين فيهم السلاح النووى ومش شايفين ايران المفترية الى بتهدد امنهم وخليتهم يجلهم اكتئاب نفسى وعصبى لاااااااااايابوبو مينفعش كدة انت لازم تقف فى وشهم وتخليك سبع من اولها ونحاربهم ونخلص منهم ب

بوبو:بس هنحاربهم وهنقول قدام العالم اية؟

شوشو:انت بتسهبل يا راجل مش عارف تقول اية هم اساس ليهم عين يتكلموة مش كفاية عليهم هنخرج جيشنا من العراق بعد ما جبنا درفها احم احم اقصد بعد ما حررانها وهنودى جيشنا المسكين افغانستان يبقى قول هنحاربها علشان مفهاش اسلحة دمار شامل اصل جملة فيها اسلحة دمار شامل دى قدمت وبقيت موضة قديمة وكمان احنا لازم تكون سياستنا برضة مختلفة وليها نكهة خاصة

بوبو:اممممممممممممممممممممممم

شوشو: بتفكر فى اية؟....بوبو:فى موضوع الازمة المالية مش عارف هعمل فيها اية؟

شوشو: ودى حاجة برضة ياراجل ماحنا هنشيل ايدينا خالص من موضوع المعونات دة الى مش جايب همه ومجرد منظر قادام العالم ونخيلى العالم التالت والدول النامين الى فرحانين كلهم دلوقتى بنتخابك ومزقطيطين يالطموا ويولول خليهم بس يفرحلهم شوية اصلهم مش عارفين المستخبى لهم

بوبو:عندك حق يا شوشو كفاية بقى وجع دماغ بالعالم التالت والرابع وروحى جبيلى طبق كشرى اصتبح بى وكوباية شاى فى الخمسينا وولعيلى التليفوزيون علشان ميعاد مسلسل نور قرب!!1

Monday, November 3, 2008

لية يا صاحبى؟ اهداء الى بيكر+تحديث

Monday, November 3, 2008
لية يا صاحبى الحزن مليك
والالم جواك ومليك
لية عيونك دايما شاردة
وفيها حسرة وحيرة انا شايفة
ونبرة حزن انا سامعةوبأة غدر انا حاسة
خدعوك وبعوك انا عارفة
وبخنجر مسموم طعنوك
ولا فرق معاهم جرحك
ولا فرق معاهم دمعك
وخلوك بأيدك
تطفى شمعك
وتغرب شمسك
وتنيم قمرك
وتمشى فى دنيتك
تايه مجروح وبتنزف
وفهموك ان دى اخر محطة
لا ياصاحبى
اوعى تيأس
اوعى تقول دى نهايتى
دولة ولا يستهلوا دمعك
وخلى ايمانك بالله كبير
يلا امسح دمعك وانا هطيب جرحك
هاتايدك يلا فى ايدى
وبكرة اكيد احلى
.........................................

الله يخليك

الله يخليك

يا اعز صديق

الله يخليك

يااحلى رفيق

(لله يخلي)


البسمة ماتفارق وشك
والحزن يبعدة عنك
وينور قلبك
ويسعد ايامك
ويبارك فيك
الله يخليك يا اعز صديق
....................


معلش يا بيكر انا عارفة ان البوست مش قد كدة خالص
معلش حاجة بسيطة كدة...

تحديث كفايك بقى حزن بقيت شبه الراجل دة


ومش هنعرف نجوزك خليك فرش زى الراجل دة واعمل سبايكى ههههههههه فكك بقى قشطة

ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket