Tuesday, July 5, 2011

كيتوفان...بشرى

Tuesday, July 5, 2011

كيتوفان ....علاقتنا مع بعض بدأت كده من سنتين هو انا لحد دلوقتى مافتكرش مرة انه سكنلى الآلم فعلا!!!يعنى على ما أظن انا كنت بحاول اوهم نفسى انى بتحسن عشان ماجرحش شعوره..ورغم كده انا ماقدرش أستغنى عنه بقى جزء من تكوينى أو أخويا التانى لو عايزين تحديد اكتر!!نقدر نقول انى بخده من باب العشره ماتهنوش الا على ولاد الحرام
لكن أنا اكتشفت نوع تانى من كيتوفان نوع بيسكن فعلا اه وربنا
نوع يمكن كلنا معانا بس ساعات مش بناخد بالنا منه...هو كيتوفان بشرى (المسكنات البشرية ) الى عايشة فى حياتنا
:وليها انواع زى المسكنات الى فى الصيدلية
:
فى مسكنات فى حياتنا(حياتى) زى كيتوفان الى فوق ده ولا لى اى 30 لزمة معايا بس فى نفس الوقت مانقدرش نستغنى عنهم يمكن العشره الى بتخلينا نكمل معاهم
:
مسكنات بتجيب معاك تأثير فى البدايه لأنك (أول)مرة تستخدمها وبعد كده للاسف تشوف التأثير الجانبى عليك
:
مسكنات ملونة يعجبك شكلها فى العلبة وانت زى الأهبل تاخدها كلها على بوق واحد...وفى الأخر تندم انك مقرتش موانع الأستعمال
:
ومسكنات بمرور الوقت (بتفقد)معاها تفاعلاتك الكيمائية..نسبة التفاعل بينكم بتقل
بتقل تقل تقل تقل لدرجة تبقى معدومة بس لاأرديا بتلاقى عضلات وشك بتبتسم ليهم عشان ماتحسسهمش
انك أخر مرة هتستخدمه تانى
:
فى نوع خاص بقى من الكيتوفان البشرى الى بيسكن (قلبك) فعلا ممكن نطلق عليهم بنادول أكسترا دليل على قوة المفعول فى حياتنا...الناس دى بقى اقصد المسكنات دى بقى مش بتشوفها كل يوم زى المسكنات التانية
لأ...دوله بيعرفوا يظهروا فى الأوقات الصح
فى الوقت الى انت محتاج فى حد يطبطب عليك
حد يقولك:أنت جوه قلبه بجد...يعرفوا يمسحوا دموعك من قبل ماتدمع
يعرفوا يدوك حضن كبيييييييير حتى لو بينكم مسافات الدنيا كلها
بيسبوا جوه قلبك علامة كبيرة تقدر تحيك لأيام
...............
ملحوظة: مش شرط بنادول اكسترا ..ده يكون حد من قرايبك او أصحابك
فى ناس ساعات فى الشارع ولاتعرفهم ولايعرفوك يدوك التأثير ده..عن تجربة أو تجارب
................................
ملحوظة كمان: البوست ده من غير عيد ميلادك وهو فى دماغى انا كنت هكتبه ومكنتش هكتب اسمك عليه كنت هسيبك تحسى الكلام لوحدك معلش لو البوست معرفتش أعبر او اكتبه بأسلوب أحسن انا بقالى قرن ماكتبتش كويسة انى فاكرة الحروف أصلا..بس صدقينى طالع من القلب اوى
أنا مصممة انى مكتبش أسمك لانى بحب لمة بنكتب لبعض كده
كل سنة وانتى طيبة يااكبر قرص بنادول أكسترا فى حياتى
وربنا يخليلى كل البنادولات التانية
أاااااخر ملحوظة: نونتى بلاش لاوية البوز دى انتى عارفه انك اكيد منهم
انا مابحبش اكتب اسامى بحب كل واحد بحبه يحس كلامى من غير ما أقول: الكلام ليكى ياجارة
^__________________________^

Thursday, May 19, 2011

كان هنا فى..مدونة

Thursday, May 19, 2011


....................................

Friday, March 18, 2011

كلنا أيد واحدة....كلنا ضد محسن

Friday, March 18, 2011
قصة محسن مع مصر

:
مشهد واحد
ليل خارجى.... الجو برد اوى الشباك بيتفتح مرة واحدة والقهوة بتفور
مصر بتحاول تقاوم: لا يامحسن لا يامحسن
-القهوة فارت-
محسن غلط ..غلطة شنيعة مع مصر

:
مشهد أتنين
الغلطة بانت اوى على مصر
-:والى فى بطنى يامحسن؟؟
محسن بكل أستهبال وعبط
/:هو الأهلى غلب كام كام النهاردة؟
:
مشهد تالتة
:

أهل مصر معرفوش كل ده يعيشوا فى العار
جابوا أبو محسن من قفاه
وخلاص كان محسن هيكتب على مصر
على سنه الله ورسوله
لكن ناس ولاد حلال
قالوا طب مايكتب عليها عرفى
عشان نسترها وبعدين يكتب عليها
@!!!!!!!!!
:
مشهد أربعه
:
مصر حاطه أيدها على راسها
وبتقول يارب: بكرة ماتفضحنيش
مش عايزة اروح الوبا مع هنادى
:
مشهد النهايه
:
فى أيدك انت
:
لو عاوز محسن يكتب على مصر (عرفى)..أنت حر
لو عاوز( تتفرج) على مصر ياترى هيتكتب عليها عرفى ولا على سنه الله....أنت حر
بس انا مش هخلى محسن يجى جانبها أصلا
كلنا أيد واحدة...كلنا ضد محسن

لأاااااااااااااااااااااا
لأااااااااااااااااااااااااااااااااااا
لاااااااااااااااااااااااااااا

قام بدور (الدستور) محسن
ده أحنا صعايده يااااااااض

Tuesday, March 15, 2011

قص من غير...لزق

Tuesday, March 15, 2011

أردت أن تنهى المهاترات (السخيفة) التى تحدث بينهم دائما نظرت أليها بنظرة مختلفة تلك المرة وقالت ثلاث كلمات كفيلة أن تمحى أى رواسب بينهم:
مش هخذلك تانى-:
مسامحكى-:
بحبك-:
ردت عليها بأبتسامة جعلت تفاصيل وجهها تختلف تماما
ردت عليها الأبتسامة ثم أنصرفت من امام
مرآتها
♥ ♥ ♥
:

....................................
تعشق دائما الأستماع أليه تعشق تفاصيله عندما يتحدث.... ولكن عندما يتحدث عن حبيبته ينقبض وجهها لاأرديا فهى تذكرها بفشلها بأنها فى عيونه مجرد صديقة مخلصة لم تعرف كيف تتعدى حاجز الصداقة معه لم تعرف كيف تخبره أنها تود أن تسطر سطر فى كتابه فى فصل (الأحباء) وليس فصل الأصدقاء لم تعرف غير تستمع أليه فقط
-:مالك؟
/:لامفيش ريحة السيجارة خنقتنى
يعتذر لها ويطفئ سيجارته مسرعا ويكمل حديثه عن حبيبته
..................................
:
تحاول جاهدة تلك المرة أن تكتب عن كل شئ يشعرها بالأختناق من كل ماحولها
تحاول أن تبكى بشدة من خلال كلماتها
تحاول أن تخبر كلماتها بانها لأول مرة تعرف معنى أن يخذلك شخص وبقوة
تحاول أن تتأقلم مع ماحدث ولكنها فشلت كما فشلت أن تكتب
.....................................
:
تحلم كأى فتاه بالحبيب المنتظر ..تنتظر تحت لافتة(الانتظار) ولكنها
وجدت وسط صفوف الانتظار الكثير من الفتيات رسم على وجههم الزمن
الكثير من العلامات القبيحة (يخشون) الذهاب من تحت الافته دون أحد
يخشون نظرة (الغير) لهم وكأن شئ ما ينقصهم
منهم من يقبل بأى شئ (كالكلب) ينتظر أى عضمة..ومنهم من (مازال) تارك نفسه للزمن يرسم على وجه مايشاء

قررت فى تلك اللحظة أن تكسر الافته الخاصه بها وظلت تردد بحدة شديدة
-:مش هقف تانى صف أنتظار
-:مش هقف تانى صف أنتظار
-:مش هقف تانى صف أنتظار
...................................
:
عندما لاتجد شئ ما يسعدها تأتى بصفحة بيضاء كبيرة
وترسم أشياء الى حد ما ساذجة..تختار أكثر الألوان فرحا
وتعشق بعد كل رسمة أن (تشخبط) على وشها
بالألوان .......وتبتسم
^_^

Thursday, March 10, 2011

لا ...للنفخ

Thursday, March 10, 2011

أنا كنت جزء من النظام لمه .....خوفت أشارك يوم 25 يناير
لأنى خوفت من الشرطه أنها تنفخنى
وخوفت (تانى) مرة لمه مانزلتش أشاركهم معنويا لأحسن المؤيدين ينفخونى
تعددت الأسباب...... والنفخ واحد
لكن من النهارده مصر بتتغير وأنا كمان
أنا ضد النفخ بجميع أشكاله

لا ...للنفخ

Monday, March 7, 2011

ياااااااارب

Monday, March 7, 2011
لتجعل روحى مطمئنة..وأكثر سعادة

ولتستردها حينها

أمين ..أمين...أمين


Thursday, February 10, 2011

على فكره يفاوض =يتنحى...اه وربنا

Thursday, February 10, 2011
هو مش خلاص أنتهى بس (بشياكه)؟
-بس هو ماقالش أنه هيتنحى
هيقول فين تانى؟؟ ما ده كان الخطاب الأخير
-اه الأخير بس برضه ماقالش أنه هيتنحى
أمال مفهومك لكلمه يتفاوض لعمر سليمان ايه؟ هو خلاص الرئيس الفعلى عمر سليمان هو بقى رمزى يعنى خلصت
بس ماقالش الكلمه يعنى-
طب وبعدين يعنى ب
الصلاه على النبى كده؟
-هنروح على القصر الجمهورى
بس هو مش هناك..وبعدين الحماسه لو خدت اى حد وقال نقتحم وبتاع الحرس الجمهورى هيبقى فى حال( دفاع) عن النفس وهتحصل فوضى
-مش مشكله المهم يتنحى
أنتى عارفه لو الوضع أستمر كده الجيش هيعمل أنقلاب عسكرى
-لا الجيش ده
حبيبنا ومعانا
لا وحياه تنطى أنتى مش فاهمه الليله الجيش لو طلع وعمل بيان وعمل الانقلاب وقتها حظر التجوال هيتنفذ على حق ربنا والى هيخرج ملهوش ديه ووقتها الجيش مش هيسيب الحكم الا لمه الاوضاع من (وجهه نظره) تكون أستقرت والله أعلم امتى كده يعنى ممكن تعدى سنين على الوضع ده
وبعد تفكير منها حسيت أنها
أتأثرت قالت وبثقه
-مش مهم المهم أنه يتنحى
الصراحه أقنعتينى بكلامك والله ربنا معاكم أنا رايحه
-قاطعتنى قبل ما أكمل الجمله
-ايه هتيجى معانا والفرحه مليه عينها
قولتلها لا أنا رايحه أرقع بالصوت على مصر


Saturday, February 5, 2011

خبر عاااااااجل: (الموساد) تعلن مسئوليتها عن صلاه الجمعه .........

Saturday, February 5, 2011

وأنا أقول (مستهيلى )سامعه الله أكبر بطريقه مختلفهّ !!!
طلعت الموساد كلها بتصلى عندنا الجمعه
ااااه يا ولاد الايه ياعفااااااااااااريت

♥ ♥I like the Mossad

حلة

المشكله الى (هتخلينى)ألبس الحلة على نفوخى وأجرى فى الشارع:
: أنى فاهمه لحد دلوقتى الناس قاعده فى التحرير ليه؟

:أنى فاهمه الناس فى البيت بتشتمهم وبتشوهم ليه؟
أنى فاهمه لو ال(80)مليون عمل
وا (عجينه الفلاحه) فى التحرير لبابا حسنى مش هيمشى؟
نى فاهمه أن فى وسط كل ده فى بلد بتنهار؟
:أنى بحاول (أقرب وجهات النظر) ببعض بلاقى (نفس البصه) والأسقاطات
...
أقولكم حاجه أمسحونى قبل ما أمسحكم
♥ ♥
أصل ده بقى شعار المرحله!!!!! عن أذنكم أنا رايحه ألبس الحلة
5/2/2011

Thursday, February 3, 2011

المحروسة مابقتش محروسة

Thursday, February 3, 2011
:
25 يناير
:الشعب المصرى يعبر عن غضبه ضد النظام الحاكم ويطلب
تنحى الرئيس مبارك
حل مجلس الشعب والشورى
حكومه أنتقاليه
لجنه تأسيسيه لتغير الدستور
الداخليه فى بدايه الامر(تحاول)أن تظهر بشكل مختلف أمام كاميرات التلفزيون بمحاصره المتظاهرين فقط لكن تفشل (المحاوله)فشلا ذريعا وبدأت تكشر عن أنيابها:سقوط ضحايا ومصابين وأعتقالات واسعه
الغريب التى لم (تعتاده) الداخليه هو :ثبات المتظاهرين على مواقفهم وعدم أخافتهم بعدد الضحايا والمصابين بل زادو أصرار وعددا
فى نهايه ليله الثلاثاء25 تحاول (جاهده) الداخليه فى عدم أبقاءهم فى ميدان التحرير
والمتظاهرين يحاولون(جاهدين) الابقاء فى ميدان التحرير
:
26يناير
الداخليه (تتوعد) المتظاهرون
المتظاهرون(تتوعد) الداخليه
مع فارق القوه بينهم
شريحه كبيره من الشعب المصرى تراقب مايحدث فى البيت وعلى شاشات التلفزيون(العربيه) منهم: من يريد المشاركه فى ثوره الغضب ولكن فى ذهنه(العين الحمرا للداخليه)فيشعر بالغضب والسخط على نفسه فيبقى ساكنا
ومنهم لايفهم مايحدث ويباشر حياته طبيعى
فى نهايه ليله الاربعاء 26 يسود المشهد تعتيم أعلامى مصرى
:
27 يناير
تنقلب الموازين تمام
البورصه تنهار
قطع خدمات الأنترنت والتليفون المحمول
وأختفاء رجال الشرطه من جميع محافظات مصر
المحروسه (مابقتش محروسه) بلاخدمات بلا رجال شرطه
أحتراق جميع أقسام الشرطه ومكاتب الحزب الوطنى
بسبب (الأحتقان)تجاهم
فى نهايه ليله الخميس 27 (المحروسه)تسرق وتحترق
:
28يناير جمعه الغضب
التلفزيون المصرى بعد ماخرج من سبات عميق يحاول تهدئه المواطنين
والجزيره:تعلن عن هروب المسجاين
العامل الزمنى يفرق كثيرا مع المتظاهرين والمواطنين لعدم ظهور أحد من المسئولين ليتحدث
يتحدث صفوت الشريف ولكن دون فائده
التلفزيون المصرى يعلن(أخيرا) عن خطاب السيد الرئيس:أقال الحكومه السابقا
أمر بتشكيل حكومه جديده برئاسه أحمد شفيق
ندد بالسرقه والسلب
*نزول الجيش المصرى ميدان التحرير وبدايه حظر التجوال
*جميع السفارات تطالب رعايها من الخروج من مصر حتى سفاره العراق
فى نهايه ليله الجمعه 28 المحروسه( تستغيث) من كل: شرطى فاسد ومجرم وهناك من أشترك معهم الذين يمتلكون النفوس الضعيفه فى ترويع الأمنين
المواطنون يشكلون لجان شعبيه بالاسلحه البيضا
:
30و31
يناير
وتستمر المهازل الاخلاقيه فى الهجوم على المستشفيات والبنوك والبيوت ومحاوله سرقه المتحف المصرى
مع عدم رضاء لخطاب الرئيس الاول و تستمر المظاهرات
اللجان الشعبيه تحاول (جاهده) تنظيم المرور والقبض على الهاربين وعدم أستغلال البعض للأزمه
عدم التصريح لقناه الجزيره للبث فى مصر وغلق مكتبها فى القاهره وسحب التراخيص
الجزيره (**ترد** )بأذاعه فيلم تسجيلى وراء الشمس لتعذيب جهاز الشرطه للمواطنين
لزياده الأحتقان بين الشرطه والمواطنين
ونشر أخبار تزيد الأحتقان أكثر وأكثر
أسرائيل تعزز قواتها على الحدود المصريه
عوده خدمات المحمول
*شراء المواطنون السلع الأساسيه بكميات مبالغ فيها ونقص حاد فى السلع الأساسيه فى بعض المحافظات
فى نهايه أيام 30و31 الأحتقان يتزايد والكل ينكل بأحمد عز ودعوه لمظاهره مليونيه
والمحروسه مازالت تستغيث
:
1فبراير
عوده خدمه الأنترنت
المظاهره المليونيه
البرادعى: يرفض الحوار مع نائب الرئيس حتى رحيل مبارك وفى نفس الليله يقابل السفيره الاميركيه بالقاهره
خطاب الرئيس الثانى(الذى لو كان أول خطاب لكانت الأمور أهدء الأن) العامل الزمنى فى ظل تلك الأمور هو الورقه الرابحه
الرئيس يعلن عن: عدم ترشحه لفتره رئاسيه أخرى
تعديل الماده76و77 المتعلقه بمده الرئاسه وترشيح الرئيس
الملاحقه بالخارجين عن القانون
تنفيذ الاحكام القضائيه الخاصه ببطلان الانتخابات فى بعض الدواير
الخطاب أدى ألى أنقسام المواطنين أكثر وأكثر
الى:هناك من أبكهم خطاب الريس ولقبه بالأب وحقن أحتقانه تجاه الشباب فى التحرير ويتسألون:
ماذا يردون أكثر؟؟
هناك من أرتضى بخطاب الريس ورحل من التحرير
هناك من ظل فى التحرير رافض الخطاب وندد برحيله والأن
نهايه 1 فبراير الأنقسامات تتزايد بين المواطنين
:
2 فبراير(اليوم الأسود) على الاطلاق
مظاهرات تأيد للريس مبارك فى جميع المحافظات
ودخول المتظاهرين المؤيدين الى ميدان التحرير وبدأت المجزره
ورغم انه معروف ستحدث أشتباكات بين الأثنين اذا وصل طرف للأخر
الا أن الجيش لم يفعل أحتياطه لتأمين ميدان التحرير وعدم دخول مؤيدين للريس مبارك
نهايه يوم2 فبراير تتزايد الأحتقانات ضد الشباب المتظاهرين وتحميله مسئوليه المجزره
الشباب المتظاهرين يتزيدون أحتقان ضد بلطجيه الحزب الوطنى وضد اى مواطن يرفض تظاهرتهم ويحملون مبارك المسئوليه كامله على ماحدث وسوف يحدث
:
3 فبراير
حوار أحمد شفيق مع 11 حزب من المعارضه
النائب العام يأمر بمنع سفر أحمد عز حبيب العادلى والجرانة والمغربى وتجميد ارصدتهم فى البنوك
نائب الرئيس عمر سليمان يعلن حواره مع المعارضه البعض يرفض الحواره معه لكنه خطابه لم يكن يتسم بالذكاء الكافى لتهدئه الجو العام
:
البعض يدعو غدا لجمعه الرحيل وتحمل مبارك كل ماحدث ومحاكمته
البعض يدعو لجمعه السلام والاستقرار ويكفى ماحدث من أنهيارات أقتصاديه وأخلاقيه وان مبارك اذا لم يذهب غدا فهو ذاهب ذااااااااااااهب
البعض متخوف من عدم فض المظاهرات فى التحرير معللين:هل لو تنحى مبارك الأن هل سيرحلون من التحرير أم ستستمر المظاهرات حتى محاكمه مبارك أو ضد عمر سليمان كرئيس حالى بعد مبارك...وهل لو لم يتنحى مبارك ولم يرحلوا المتظاهرون من ميدان التحرير
هل ستنزف المحروسه كل هذا النزيف؟
*أنا لم أبكى من خطاب الرئيس ولم أتأثر به
و أحمل مبارك كل ماحدث حتى الأن ولا أقول تلك الكلمه العقيمه: تذكروا له
أنه صاحب الضربه الجويه!!!ولا أريدك أيها القارئ أن تتأثر بوجهه نظرى
ولاتجادلنى ليس لأنى أخشى الحوار مع أحد ولكن قبل ان تكتب:
وتشحن نفسك ضدى وتتراشق لى بالأتهامات بأنى مغيبه هبله ساذجه
وأنى أزاى مش شايفه الى بيحصل؟؟ وأنه فرد قدام شعب ولازم يتنحى
من فضلك عزيزى القارئ: فكر هل تستحق (المحروسه) كل مايحدث
أنا لايهمنى من السبب الأن هل هو مبارك أو المتظاهرين بميدان التحرير
أنا أنظر وأبكى الأن على وطن يتمزق
ننقسم بين أنفسنا
أصبحنا فئات عزيزى القارئ
ولايوجد صوت (عقل) واحد
يريد حل وسط الأن؟؟
!!!!!!
نهايه يوم 3 فبراير (بالنسبالى) الكل فى وادى ولا أحد يستمع لصوت العقل
العند مسيطر على الطرفين الكل يتراشق بالاتهامات لايريد احد الأنسحاب الا على (جثه) الثانى
مازلت المحروسة (تنزف) وانا أتمزق داخليا



Friday, January 14, 2011

لايافرج

Friday, January 14, 2011

الشعب التونسى: ايه

الشعب المصرى:ايه ...ايه

الشعب التونسى: انت اهبل ولا ايه أنا عملتها!!

الشعب المصرى بيبص للشعب التونسى بنظره شكه وريبه ويبعد خطوتان لورا:ويردد بطريقه بلهاء عملتها

!!!!!

الشعب التونسى: انت مش واخد بالك ولا ايه!!أنت مش ناوى تعملها ولا ايه

الشعب المصرى بكل ثقه وفخر: لا انا أطهرت من بدرى

الشعب التونسى:!!أنا بكلمك عن التحرير

الشعب المصر ى مقاطع الشعب التونسى: ااااااه ممكن تركب المترو او اى أتوبيس هيوديك على هناك على طول

الشعب التونسى: بس أحنا طريقنا مكنش فى مواصلات كنا أحنا المواصله

الشعب المصرى يسخر بداخله من الشعب التونسى:ان شاء الله هنركب أول توك تك وهنجيلكم

الشعب التونسى يقترب من الشعب المصرى ويحط أيده على كتفه

الشعب المصرى ينتفض بمجرد وضع يد الشعب التونسى عليه ويتذكر مشهد لفيلم الكرنك الشهير عند اغتصاب فرج لسعاد حسنى

الشعب التونسى مقترب هامسا

الشعب المصرى فى وضع استعداد ليصرخ ويقول بأعلى حس لا يافرج لايا فرج

الشعب التونسى: بس عمرك ماهتوصل مادام مستنى مواصله

وقبل ان يذهب الشعب التونسى رمق الشعب المصرى بنظره( لم تتحد هويتها الى الان) هل هى نظره أمل أم نظره ملئ بالخيبه

ومازال الشعب المصرى

مستعد ليصرخ ويقول: بأعلى حس لا يافرج لايا فرج


Monday, January 10, 2011

لسه قادر على الفراق!!!!

Monday, January 10, 2011

عارف والله العظيم قبل ما أكتب الموضوع حاسة ان قلبى هيحصله حاجة بمجرد بس التفكير فيك

أنا مش عارفة أقولك ايه !! ولاعمرى اصلا تخيلت أن ممكن يكون بعدك عنى مأثر فيا للدرجة دى أنا كنت واخدة الموضوع عاااااادى جداااا بس الظاهر كنت معتوهة اه والله معتوهة أصلك ماتعرفش الناس وحشة قد ايه هنا مابيصدقوا بس أتنين يبعدوا عن بعض…أنت أصلك ماتعرفش مقدااااااار التريقة اللى باخدها كل يوم

عااااااارف يا حرف السين………ياما نفسى أنطقك زى ما باكتبك كده

بمجرد مايكتشفوا أنك بعيد عنى ما اقدرش أقولك كوكتيل الاغانى الى بينزلى مرورا بأغنية-ثكر حلوة الدنيا ثكر وأنتهاء بأن العيال فى الحتة بيثبتونى ومش بيرضوا يمشونى الا لما أقول قميث نفيثة نسف ولامنسفسى!!

وكماااان يشاء القدر ان والله تطلع اغنيتى المفضلة من بين الاغانى ياربى …بت يانوثه يانوثه سايله البثوثه والله وكبرتى وحيلتى وبقيتى عروثه وأحب اطول اوى فى بثثثثثثثبوثه ….وطبعا الاغنية دى بأغنيها سيلنت من جوايا بس

أنت عارف انت قاسى أوى .. اه والله طب الى يمشى ده يمشى لوحده مش يأخد معاه الصاد والزين او حرف الذال أصل الحرفين نطقهم عندى واحد و الثاء ….وعاهة مستديمة فى حرف الشين!!! رشتهم بايه قولى ولا وعدتهم بايه وخليت مخدتش ليييييييييه بقيت الحروف بالمرة !! وسبتنى أشاور .. أكيد زمانكم بره دلوقتى والبليه لعبت معاكم

طب أبعتولى باسبور اجيلكم !!

تعالوا شوفوا أخوتكم بيسألوا عليكم كل شوية والله بيقولوا: فين اخوتنا نفسنا ننطق جملة صح بقى!!!! ياجدعان عيب عليكم والله لما تيجى سيرتكم فى الكلام اكل الكلام

أمبارح نزلت اجيب فرشة اسنان باقول للراجل : لو سمحت عايزة فرشاااااااااه تلاقونى بطلع هواء فى حرف الشين قالى عايزاها نوعها ايه؟؟وللاسف كنت عايزها الى هى الحساسة دى وبعيد عنكم سألنى السؤال وفضلت متنحة قالى ايوه عايزها ايه؟؟ ومازال صمتى الرهيب مستمر يا أنسة باكلمك .. أنا روحت محركة شفايفى من غير ما انطق قالى ايييييه روحت قالت له ممكن ورقة وكتبتها له رااااااح بص لى بصة عمرى ماهنساها وراحت الدمعة فرت من عينى

طب اعمل ايه طيب أروح ملجأ أيتام الحروف؟ أروح أتبنى حرف لسه هاكبر بقى وأغيرالكفولة كل شوية وأقول بس ياواد بس يابت وأدفع دروس خصوصية وفى الاخر أكيد هيعمل زيك .. هيهرب مع اى حرف مش كويس

وأضيع انا للمره التانية !!! وأتفرج على مسلسل سنوات الضياع وأتقهر أكتر واأكتر

ااااااااااه ياااما طيب لو كان كلامى معاك حاد شوية طيب والله انا اسفة أصل بجد مفيش حلول بديلة غير أنك ترجع لى بجد فراقك صعب عليا اوى الناس فى مصر وحشين اوى

طب بص انا هديلك فرصة تفكر وراجع نفسك و وحياة أبوك ياشيخ خليك حقانى ولو جيت ماتخفش هدفع لك انا تذكرة الرجوع وأوعى ياقلبى تيجى فى عبارة لاحسن أفتقدك للابد

وأحب أهديلك اغنية لشيرين :

مش عايزة غيرك انت .. والله بحبك انت

والحب كله انت .. وانت الناس كلها

وسنين عمرى الى راحوا .. قلبى عاشها فى جراحه

وان شاء الله لما ترجع هاكمل المقطع الاخير من الاغنيه : كااااانت ناقصانى حاجة ومعاك كملتهااااا

**********************

على مجله الكرمه أضرب من غير تفكير

ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket