Saturday, February 5, 2011

حلة

Saturday, February 5, 2011
المشكله الى (هتخلينى)ألبس الحلة على نفوخى وأجرى فى الشارع:
: أنى فاهمه لحد دلوقتى الناس قاعده فى التحرير ليه؟

:أنى فاهمه الناس فى البيت بتشتمهم وبتشوهم ليه؟
أنى فاهمه لو ال(80)مليون عمل
وا (عجينه الفلاحه) فى التحرير لبابا حسنى مش هيمشى؟
نى فاهمه أن فى وسط كل ده فى بلد بتنهار؟
:أنى بحاول (أقرب وجهات النظر) ببعض بلاقى (نفس البصه) والأسقاطات
...
أقولكم حاجه أمسحونى قبل ما أمسحكم
♥ ♥
أصل ده بقى شعار المرحله!!!!! عن أذنكم أنا رايحه ألبس الحلة
5/2/2011

5 comments:

Sameh Ezzat - (خواطر خاطر) said...

حلوه نظريه الحله بردو

فاتيما said...

الحلة بتلمع قوووى
:)

بصى يا كيكى
براحة على نفسك يا حبيبتى
وعلى غيرك كمان
بصى مش مطلوب منك تحددى موقفك
لو لسه متشوشة ومش قادرة تاخدى صف

خدى وقتك
اقرى اكتر لناس راحت وشاركت
وناس مرحتش برضو
بصى دى نعمة القراية وميزتها
انك بتكونى افكارك وجهات نظرك يوم ورا يوم ومرة ورا مرة وموقف ورا موقف
يقوم لما ييجى وقت الجد ...
تشوفى كل حاجة واضحة

يعنى انا اللى افهمه دلوقتى
انك عارفة كويس مثلاًُ
ان فلان الفلانى حرامى افاق ابن ستين ف تمانين وبقاله 20 سنة كابس على صدور الناس وقلوبهم ...
تفتكرى هييجى ف اليوم الأول بعد العشرين ..يعرف ان الله حق ؟!!
لأ أكيد
حتى لو لمح لك بإنه خلاص
هينفذ اللى طلبتيه بس اديله فرصة
لأ متصدقيش
لأنه مكنش هيقر بحقوقك لولا فضحتيه وبهدلتيه وانتفضتى بعد سكوووووت طويل وقولتى يا قاتل يا مقتول
تفتكرى شخص زى دا لسه عنده ضمير ؟
لسه عنده شرف ؟
لسه عنده حاجة يخاف عليها غير نفسه ومصالحه ؟
أكيد فى اول فرصة هيعرف ينهشك ..مش هيتآخر
خلاص بقت قاتل ومقتول ويا روحك يا روحه
الفرق بينه وبين الناس
ان الناس موافقة انه يغور وبس
لكن هوه .زمش هيسيب حد يغور على بيته
دا هيفتك بيهم نفر نفر ويتغدى ويتعشى بيهم ...وانتى شوفتى المذبحة يا بنتى ولاّ مبتتفرجيش على المشاهد والصور !!

أكيد بتشوفى
يبقى اللى ضميره مقبرة
يوثق فيه تانى ؟!!
يوثق فى أى رجل يأتى من بطانته ؟!!
بالعقل كدا
اللى رفضوا يعملوه 30 سنة بالرضا
هيعملوه للغجر اللىف الشوارع دول بالغصب فى شهور ؟!!
أكيد لأ

الخسة لا تصبح شهامة
دا طبع
والطبع والروح ف جسد

الحل
معاكى انه مخيف
ومليان رعب قادم على رأى صلاح عبدالصبور ...
لكن رعب وفزع وخوف ..مع الصح
يبقى ربنا مع البلد دى
وينصرها ولو بتمن

لكن رعب وفزع وخوف ..زى 30 سنة عدت
يبقى حرام ..ونستاهل الذل


مبلبش منك تنزلى
ولا تشاركى
ولا حتى تقتنعى دلوقتى يا حبيبتى
بس بطلب منك بس
تستنى شوية
متقوليش لحد متنزلش ومتتظاهرش
لأنك بتحبطى حماسه
وبتهزى احساسه بإنه صح
صحيح هوه مقتنع وعارف انه صح
بس لما حد غالى عليه او احباب حواليه يقولوا العكس
لازم يتهز شوية .. الخوف كبييير
اذا كنتى انتى عكس رأيه وخايفة
ايش حال هوه اللى نازل وروحه على كفه والف حد بيقوله لأ ...

هتقوليلى انا مأيى مش مهم
هقولك لأ والف لأ
مش حقيقى
انتى مهمة قوى
عند كل اللى بيحبوكى وتحبيهم
ولما متبقيش معاهم على قلب رجل واحد
بيحسوا بإحباط شديد وحزن

محدش بيلوم حد
بس اتمنى محدش يخون حد
كل واحد ايفها من زاويته بس
والخونة والعملاء معروفين قوى وطالعين ف الفضائيات والأعلام ...

روقى وشيلى الحلة من على راسك يا بت
ان شاء الله الجنون يطال اللى يستحقوه
مش احنا خاااالص
كفاية علينا ربع قرن جنان

:)

خلى بالك من نفسك

اسيره الاحزان said...

هههههههههههههههههههه كل واحد دلوقتى ماشى بحله على فكره

مونيتا said...

نقدم لكم اليوم من خلال موقعنا كتاب سيرة ذاتية
مميز وفريد والذي يساعدكم جدا في الوصول إلى وظيفة احلامكم بكل سهولة ويسر وبعيدا عن عناء و تعب كتابة سيرة ذاتية

نور الهدى said...


نستخدم افضل ادوات تنظيف و غسيل الخزانات لاننا افضل شركة غسيل خزانات بالمدينة المنورة و عمال مدروبون وحاصلون على شهادة صحية فقط اتصل بنا لتحصل على افضل خدمة غسيل خزانات بالمدينة المنورة




ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket