ست الحنانه يا ضنايا انت

ماما...

ماما بالنسبالى زى الكوبرى الدائرى هو المفروض يوصلك فى اسرع وقت ومن غير مشاكل لكن العكس بيحصل بيوصلك على نقاله!!!دة بس بيحصلى لو حصل اختلاف فى وجهات النظر

ماما بالنسبالى زى التوك تك بحب اشوفه بيمشى عشان سريع وبيعرف يوصل مشاويره فى الوقت المظبوط بس لو قلب عليك يقلبك فردة كوتش

ماما بالنسبالى زى شيكولاته كابرى لم بقعد أكل فيها كتير بحس انى بروح غيبوبة وبتسطل لمة بعك فى الكلام مع ماما بتعمل زى كابرى بالظبط بس بالشبشب
ماما بالنسبالى زى شركه فودافون تحط رجلك فى الخايه لحد ما تستلف السته جنيه منها وبعد كدة تروح تفضحك قدام امه لا اله الا الله
ماما بالنسبالى زى شاى رويال للرجيم يخدعك فى الاول وتحس نفسك بتخس وبعد كدة تظهر اضراره على المدى البعيد ودة لمة هتعمى قريب من كتر الضرب على قفايا
ماما بالنسبالى زى المنتخب الوطنى لمة بيكسب بحب مصر اوى وهى لمة ربنا يهديها وتضحك بتبقى زى حب مصر كدة بس حب وقتى
ماما بالنسبالى زى السبكى هو وراء انهيار السينما المصرية هى وراء انهيار اعصابى
ماما بالنسبالى زى شعبان عبد الرحيم لمة يقول اييييييييييييييييييييه لمة باجى اطلب منها فلوس
ماما بالنسبالى زى اغنيه الدنيا زى المرجيحه يوم تحت وفوق لانها ساعات ترمينى من فوق السطح او تحت عربيه
ماما بالنسبالى زى محمد سعد مستحيل تقنعه بانه يغير نمط افلامة وهى مستحيل تقنعها انى مش الفلبينيه الى هى شرايها
ماما بالنسبالى زى حسن الهلالى انا متاكده انى هبقى الاول فى فيلمها الانتقام الرهيب
ماما بالنسبالى زى فيلم المرأه والسطور عماله تتفرج دلوقتى على اعلانات تميمة الله يحرقهم بجاز وتبصلى وهى بتحضر فى الاكياس عشان لسة مجبتش هدية عيد الام
عزيزى القارئ ربما تكون هذة اخر كلماتى استحلفك بالله ان تطلب رقم البوليس وان تبلغ عن امى
ولاتنسى الدعاء لى بالجنه
وان لله وان اليه راجعون

الشهيده بأذن الله كيكى عوووو ضحيه عيد الام

عشان أعمالنا السودة

دوس هنا يمكن ربنا يكرم

أنا شارب سيجارة بنى حاسس ان دماغى بتاكلنى

فى اشاعات نازلة اوى اليومين دول من ساعه الكبير ماحصل الى حصلوا انه لاقدر الله يعنى هيموت!!!...واحنا كان المفروض كواجب علينا لانه فرد منا ننقطوة حلاوة ماقام بالسلامه
بس مش دة الموضوع دلوقتى الموضوع انى فكرت لو مات بجد بجد بجد يعنى الاهرام هتنشر تانى يوم:
السيد الكبير يفتتح الطريق الصحراوى الجديد بين امبابه والسيدة زينب ليجعلوه طريق دولى ولاينوى ان يرشح نفسه فى الدورة الانتخابيه السابعه والثلاثين ويرفض بشدة ترشيح ابنه *الرئيس الحالى* للانتخابات القادمة رافض مبدأ التوريث تأكيد لسياسته الحره
ومع الخبر صورة لى وهو بالكفن وبيقص شريط الطريق
!!!११!

نهايه سعيدة

مش عارفة ابتدى منين؟؟

بس بجد اول الموضوع ماحصل قلت لازم تكونوا اول ناس عارفين
مش عارفة اكتب بجد من الفرحه مرتبكة اوى وقلبى بيدق بشكل فظيع
انا لسة اصلا مش مستوعبه الموضوع!!!
النهاردة...قابلنى عميد الاكاديمية وبشرنى وقالى خلصى يلا الترم دة على خير عشان تبقى
معييييييييييييييييييييييدة

عندنا...عشان المعدل التراكمى بتاعى يعتبر اعلى حد فى الدفعه

همووووووووت من الفرحه بجد وفعلا ياجماعه لكل مجتهد نصيب

الحمد الله يارب انا فعلا تعبت الحمد الله على كل شئ


**********************
...
...
॥
॥
॥
॥
॥
॥
الى

لسه

متخرجوش

بيحلموا

واحنا

معاهم


@

كوكاكولا راعى الاحلام الوهميه للشباب المصرى

نداء الى أفكااااااارى

لا بجد مش قادرة أستحمل اكتر من كدة من غير كتابه!!

ايه دة عرفت اهو اكتب جمله الحمد الله يااارب يا بركه دعائكى ياما!!ياترى زمان انا كنت بكتب ازاى ياترى كانت طقوسى ايه؟ الامطة

التمام النضارة الشمس شبشب زنوبه الجلابيه الى عليها عيون حوله والبنطلون عشان التسلخات !! تمام انا عامله كل دة دلوقتى ها وبعدين بقى؟؟ايييييييييييييييييييييييييييه دنيا الصبر مفتاح الفرج مفيش يعنى حاجة نزلت على دماغى الى يصبر ينول برضه

فين ها ؟ فين الافكار؟؟ راحت فين ياترى خدت تذكرة على اول قطر وهربت..الهى يابعيدة يبتلكى بجاموسه حوله

تكنش غلطت مع واحد وراحت تصلح غلطتها؟..اوعى يامنيله يكون جرجرك بمجلد ميكى ولافلاش

ولا يمكن اتقبض عليها بسبب تهمة الاتجار بالاثار..مش قولتلك بلاش تمسكى أنابيب الايام دى

او ممكن راحت تأمن مستقبلها واشتغلت فى سنترال السيده هيقبضوها 150 فى الشهر ماديه وتعملها برضه منا عارفها

ولايمكن راحت ترشح نفسها فى الانتخابات الرئيسيه الجايه ومسكوها بتهمة التعدى على الحقوق الملكيه الفكريه للرئيس واولاده...والله وقتها ولااعرف امك ياخاينه يا عميله يلى مابيطمرش فيكى العشره الى بينا وبينهم ياقليله الاصل ياواطيه

ولايمكن لا مش قادرة اقولها باعت نفسها وعملت سيناريو فيلم للسبكى وسميتوه أوعى أوعى لا لا!! أستر على الفضايح يااااااااااااارب

طب انا ليه بفكر فى حاجات سودة مش يمكن ربنا هداها واتنقبت وبتبيع فى المترو حاجات ب 2.5

بس لا انا عارفها سودة اوى من جوه هى اكيد اكيد زمانها بتثبت العيال على الدائرى ومسميه نفسها فتاكات الدكر

عمتا ياجماعه انا هعمل نداء ليها فى القناه التالته فى تنويه عن المفقودين يمكن قلبها يحن على وترجع لاحسن انا حالتى كرب اوى ونفسيتى زى الزفت من بعد فراقها ولا لى نفس لا اى حاجة فى االدنيا وانتى لمة بتبعدى عنى غصب عنى ببعد عن صحابى وهمه ماشاااااااااااااااااااااااااء الله بينزلوا بمعدل بوستان فى الثانيه وانا زى خيبتها قاعدة وانتى عارفة من غيرك الكتابه ملهاش اى لازمة وانا مليش اى قيمة من غيرك بجد لانك انتى النجمه مش انا

كلمتان على جنب:ونبى لو حد لى قريبوا فى ماسبيروا يتوسطلى عنده لمة تجئ تنزل صورتها ينزلوا مع الصورة اغنية ##ارقص ياوليد ارقص ياوليد اررررررقص ياوليد## عشان بتحبها اوى

!!عودى يابليه بقى عايزين نلعب بالفلوس لعب..

امضاء: كيكى عووووو المجروحه

melody....sport

فى السنه الى رفضنا فيهااااا..كأس العالم

جبنا كأس الامم الافريقية تلات مرات على التوالى

(المنتخب المصرى......أم الاجنبى
2010

عند أمه يا ادهم