Friday, May 9, 2008

من يوميات برعى وتفيدة

Friday, May 9, 2008




المكالمة القاتلة........


تفيدة:الو


برعى:الو


تفيدة:ايوة يابرعى اذيك.....مكنتش بترد على طول لية


برعى:معلش كنت نايم منمتش من يومين



تفيدة: طب انا عايزة اقولك حاجة


برعى :خير


تفيدة :انا حامل


برعى:حامل


تفيدة:اة


برعى:اة يانهار اسود..انتى بتتكلمى بجد


تفيدة:نهار اسود انى حامل


برعى:انتى بتستعبطى انتى مش عارفة الظروف


تفيدة: استعبط لية ان شاء الله بقالنا مع بعض9سنين 3خطوبة4كتب كتاب2جواز ومش عايزنى اخلف


برعى :ما احنا قلنا هنأجل الموضوع شوية


تفيدة:شوية لغيط امتى احنا هنضحك على بعض..انت عندك 36سنة وانا 34سنة هنأجل لغيط امتى لغيط مااسنانى تقع وشعر راسى يوقع من الحسرة


برعى:ماانتى عارفة انا مسافر لية ومتغرب ومتنيل فى الغربةعلشان اسدد مصاريف الشقة ومصاريف الفرح لغيط دلوقتى انا مش مخلى فى جيبى حاجة وكلة باعتوة علشان اسدد الفلوس علينا..وبعد كل دة جاى تقولى انا حامل


تفيدة:اعمل اية اهوده الىحصل وانا مش هستنى اكتر من كدة انت كل فين وفين بتنزل اجازة وانا قاعدة لوحدى زى قرد قطع انا خلاص زهقت مش طايقة


برعى: زهقتى امال انا اعمل اية فى القرف الى انا فى من ذل واهانة وبستحمل كل دة علشانك مش عايز عيالى يتبهدلوا ويتمرمطوا زينا مش عايز ادخلهم حكومى ويطلعوا ميعرفوش يكتيبوا اسمهم مش عايز حد فيهم يعئى وادوخ بيهم على المستشفيات الحكومى وفى الاخر يموتوا منى مش عايز اكلهم اكل فاسد عايز اجبلهم احسن حاجة احنا فى زمن معاك فلوس عيش معكاش مش لازم تعيش

تفيدة:كفاية حرام عليك سودها فى وشى..ياراجل دة كل عيل بيجى برزقة ..وانا اوعدك هو واحد بس

برعى:استغفر الله العظيم يارب خلاص

تفيدة:خلاص انا هاروح بكرة عند الدكتور علشان تعبانة شوية

برعى:ابقى كلمينى طمنينى عليكى

تفيدة:مش هتقولى حاجة

برعى:م.ب.ر.و.ك

ثانى يوم

تفيدة:الو

برعى:خير عملتى اية

تفيدة:احم...الحمد الله

برعى:اية مال صوتك؟

تفيدة:مفيش

برعى:لافى خير

تفيدة:اصل الدكتور قلى انا لازم ارتاح الايام الجاية علشان شكك انى حامل.....فى توأم4او5!!!و

برعى:اييييييييييييييييييييييييييييييييييييييييييييييييييييييييية

تفيدة:الو الو برعى رد علية الو الو الووووووووووووووووو برعىىىىىىىى

24 comments:

Human said...

هههههههه....باعيني الراجل مات من الحسره ...باعيني ...هو فعلا كل عيل وبيجي برزقه ...لأن دي أقدار ربنا ...بس ماينفعش أكون مش لاقي أكل ..أخلف دستة عيال ..أهو هو ده الغباء فعلا

رئـــــيسـة حزب الأحلام said...

يوميات جميلة بس فعلا هياجلوا الحمل لحد امتى دول قربوا يشطبوا

كيكى said...

ازيك ياعم ...انسان..فعلا عندك حق..هو دة الغباء بعينة....بس هم معندهموش t.v علشان يوشفوا اعلان....ابلة نضيفة...والقطنة مابتكدبش....بس اية علاقة دة بموضوعنا معرفش
رئيسة....
ممكن ياجلوا لغيط ال90..انا شايفة انة سن مناسب جدا...اممممممممممم..ولا انتى رايك اية

rovy said...

السلام عليكم ورحمة الله
ايه يا بنتى العسل ده كله
سعدت بمرورى لمدونتك
دمت بخير ووفقك الله
تحياتى
rovy

EmY said...

اولى مبروك البلوج و آسفه اني اتأخرت في الزياره بس انا جيت قبل كده و قريت ب سده اول تعليق

البلوج جميل و فكرته حلوه اوي

بس حرام كده برعي شكله اتشل مكنش عاجبه واحد تجيبله توائم كمان

الظروف الاقتصاديه فعلا هاتخلي الناس تخاف تفكر في الخلفه

تحياتي

أبو خالد said...

الأبنة /خفيفة الظل كيكى
ديالوج جميل وواقعى بين برعى و تفيدة
بس أشمعنا برعى و تفيدة
أرجو زيارة مدونتى

كيكى said...

روفى....
وعليكم السلام ورحمة الله وبركاتة
شكرا على تغليقك وياريت متكنش اخر زيارة...واوعى العسل يلزق ....ههههه
ايمى...
شكرا على تعليقك...وتشرفى فى اى وفت لان البيض بيضك..ههههه
ابو خالد...
..بجد تعليقك اثر فى اووووووووووى ..بس اسمهم مش عجبك لية؟..عارف لان اسمهم يشد اى حد وفى سخريية على رومانسية وكمان واقعى ومننا احنا...المرة الجاية لمة تيجى..هتجيب شيكولاتة اةةةةةةةة...اوع تنسى

Miss. Sosa said...

السلام عليكم
اسفة علي التأخير .. المواصلات كانت زحمة والهب هنج
حلو البوست ده اوي :))
والبوست بتاع التعريق حلو اوي .. بجد ابدعتي فيه
و ربنا فعلا كريم لما بيرزق بيرزق بجد
الله يكون في عونك يا برعي
قلبي عندك :)

ياسر said...

السلام عليكم ورحمة الله وبركاته
والله حسستيني اكني قاعد عندنا

في الريف الا اتحرمت منة وعلي المسطبة

وضحكتيني من قلبي بجد برعي دة مجنون

حد مش عاوز اطفال بس انا هكلمة في الموضوع

هو ساكن قريب جنبي هنا خطوة واكون عندة اوصية

علي تفيدة يا بختة 4 اطفال

تقبلي مروري
دومتي بخير
تحياتي

حمادة زيدان said...

كيكي
نهههههههههههههههههههههه
صعبان عليا اوى برعي
أول ما ربنا يكرموا , يكرموا بأربعة أو خمسة
نهههههههههههههههههههههههههههه
شكلها بتعوضلوا كل سنين الخطوبة في يوم واحد
ياللا مستنين لما ربنا ينتعها بالسلامة

كيكى said...

سوسو...
الموصلات برضة كل شوية تقولى هجى بعربيتى...وفى لاخر القيها كارو..بس انا مش عايزة اكلم..المرة الجاية تعالى بحصان
ياسر...
وعليكم السلام ورحمة الله وبركاتة..ونبى قول لبرعى..عيب كدة واحمد ربنا..هى اة تفيدة زودتها شوية بس نعمل اية قدر ربنا
حمادة...
ادعليها..والله هى غلبانة اوووى

جيهان علي said...

السلام عليكم ورحمة الله وبركاته

توأم 4 أو 5 ؟؟؟!!!!!!!!!!!!!!!!!!!!!!

معقول !!!
ليه كدة بس يا تفيدة

أحم ..

أسلوبك حلوة

والأولاد فعلا بيجوا برزقهم وربنا هو الرزاق
برعي خايف ده حقه لكن لازم يكون عنده إيمان ان ربنا وحده هو الرزاق
وربنا هايعدلها


تحياتي

enjy said...

حرام عليكى موتى الراجل قبل ما يفرح بعياله ال14 دة حتى كان هياكلهم اكل مسرطن ومية ملوثة ويشممهم هوا من ابو سحابة سودا...كدة حرمتيهم من حنان الاب يا كيكى؟؟طب دلوقتى تفيدة هتاكل منييييييييييييين؟ خلاص بقى تبقى تسرح عيالها يشحتوا فى الشوارع...عمااااااااار يا مصر

lyssandra said...

ههههههههههههههههه

4 أو 5 ؟؟؟؟

ماشاء الله رزقه واسع


تقبلي مروري ..

lyssandra

كيكى said...

جيهان...
وعليكم السلام
شوفتى تفيدة بتعمل اييييية....على فكرة دى خطر اوووى..ههههههههههه
انجى...
اهى اهى... انا اسفة
تفيدة مش عارف تقرا اسمك شوفت الجهل....الفقى لما يسعى..هههههههههه...

emo said...

هههههههههههههههههه
حلوة اوى يا كيكى

مصطفى محمود said...

بوست رائع وممتاز يا كيكى

كيكى said...

ايمو....
انتى احلى...مستنيكى..المرة الجاية
مصطفى
ابقى تعالى على طووووول
تحياتىىىىىىىىىىىىى....

حمامة said...

هههههههههههههههههههههه

يا عينى

الراجل مات م الخضه

enjy said...

كيكى حبيبتى..والله كنت مستنية تعليقك.. المشكلة بقى انا مش فاهمة فى ايه بالنسبة للهسس يعنى انت مش عارفة تسيبى تعليق وللا مش عارفة تضيفى لينك؟لو تعليق يبقى نفس الخطوات فى كل حتة مش بتفرق بس تلاقى الكمبيوتر كان تعبان جربى تانى وطمنينى..على فكرة انا حاسة ان احنا اصحاب من اول بوست وللا انت ليكر راى تانى؟

gannah said...

تحفة بجد كتابتك تحفة انا مبطلتش ضحك بشكرك

الربان said...

تحياتي

قصة من الفكاهة... ممكن تسميها جبروت امرأة... او برعي وتفيداته...يعني حاجة من هذا القبيل...

ربنا قال في كتابة الكريم " نحن نرزقهم و إياكم "

يعني الاب و الام يرزقوا برزق اطفالهم
و ايضا ممكن ناخد عبرة من القصة..ان
كل شيء قسمة و نصيب...اجل كما تشاء
لكن رزقك 5 اولاد سيأتوا اجلا ام عاجلا.

تحياتي و تقديري

كيكى said...

حمامة....
لا دة جالوا سكتة قلبية..ههههههههه
انجى..
انتى فجاتينى...اصحاب متخلينى..اخوات احسن...ههههههههههه
طبعا اخوات واصحاب ..

رحاله said...

بسم الله
حلوة اوى وطريقه لذيذه فى تصوير واقع مؤلم
بجد اسلوبك حلو وبجد صعبان عليا اوى برعى دوت يلا ربنا يعينه
ههههههه
تقبلى تحياتى
جيلان

ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket