Tuesday, June 3, 2008

انا وبابا ونتيجة الثانوية العامة...!!.

Tuesday, June 3, 2008

هحكيلكم عن ليله فى حياتى لا يمكن انسها ليلة نتيجة الثانوية العامة..وبم انكم خلاص مش غرب وبيقنا اصحاب قلت مفيش حاجة تستخبى عليكم..متهيلى الليلة دى عند كل واحد فيكم متتنيسش واد اية كنتوا فرحانين بنجاحكم واهلكم كمان.....
ام انا فحكايتى مختلفة خالص....
نرجع للذاكرة 70سنة وراء...قبل النتيجة بساعتين..
ساعتها كانت ماما نايمه واخويا برة وبابا كان فى الشغل مطبق..وانا بقى كنت عماله ارقص على اغنية كان ساعتها جديدة ل..الين خلف اسمها صدفة..عارفينها..على فكرة انا بكرة الاغنية دى من ساعتها..واية بقى كنت هيصة وكانت شغلانة...ال البت ضامنة ال..المهم خلتى اتكلمت..خلتى: ايوة ياحبيبتى النتيجة هتطلع بعد شوية على النت هاتى رقم الجلوس..انا: حاضر حاضر.طب ونبى ياخلتى خدى ارقام جلوس اصحابى وهاتيهم معاكى...دة وقتة برضوا تتصل فية وتقطعنى عن وصلة الرقص..بعد فترة جيرانا ندهوة ..ياكيكى ياكيكى..ايوة جبتى النتيجة..لا..طب هاتى رقم الجلوس نجبهلك....انا: حاضرحاضر..طب ونبى خدى ارقام جلوس اصحابى.وهاتيهم معاكى....حد جميل يسالنى دة وقت اصحابك..هو احنا مستحملينك علشان تحكى كمان على اصحابك...هارد وقول.. لا ياعم الجميل انت انا لازم اعرف هم جابوا كام علشان محدش فيهم يتنطط علية ويقول جابوا كذا ولا جابواكذا..وفى الاخر يطلعوا جيبين ملاحق اصلهم بيحبونى اوى وانا كمان.ومفيش مانع من حبة شماته...واسكت بقى خلينى احكى لمة والله اجبلك اصحابى المصارعين..بعد شوية جيرانا ندهو.من الشارع وكانت فضيحة العربى20.5 الانجليزى12 انا قلت مش مشكلة المواد دى المهم التقيل الالمانى23 الرياضة 31.5 علم النفس26 كدة فى حاجة غلط..قالتلها يعنى كام فى المية..قالتلى الالة بايظة..كويس انها كانت بايظة..انا بقى ساعتها معرفتش ارقص تانى وقلقت وكمان مش عارفة احسبها كام فى المية بعد شوية اخويا جاة قلى النتيجة طلعت عملتى اية..قالتلوة مش عارفة احسبها راح جاب الالة وحسبها وقالى يانهار اسود 53% انا لطمت يالهوى انا بقى ساعتها مقدرتش اتنفس وحسيت ان دمغى تقيلة وقلبى واجعنى واتر ميت على الكنبة..اخويا حس بمصيبة قلى استنى استنى انا حسبتها غلط انا بقى روحى اترضلى من تانى وكنت هقوم هكلوا حرام عليك خدتنى انا عمرى ما اجيب مجموع زى دة انا.. انا راح بصلى وقالى 55%..اغمى علية..ياريتك ما كنت حسبتها تانى..تانى يوم الصبح ماما صحيت اية اختك عملت اية55%.. والله كان قلبى حاسس هى فين الساقطة الفاشلة..الى عمرها ما هتفلح فى حاجة ابدا..وبعد ما انقدت علية اخويا خلصنى منه..وعملنا اجتماع اسرى ثلاثى هو ازاى هنقول لبابا انى جبت المجموع دة..اصل بابا صعب اووى..وبعد عدت ساعات ومناقشات ساخنة قرارنا انا واخويا منقلش لبابا انى جبت55 نقولة انى جبت65% وخلى الزيادة علينا مش مشكلة..ماما لااااااااااااااااااااااااااااااا..ازاى تخبوا على ابوكم حاجة زى كدة انى عمرى ما خبيت علية حاجة ابدا..انا: يعنى جت على دى ما حضرتك عاملة فلوس فى البنك باسمك من فلوسة وهو مش عارف وبتجيبى دهب قد كدة وغيرنا الشقة100 وهو مش واخد بالوا..و..وبعد ما اتخديت قلم كدة على ماشى..انتى ليكى عين تكلمى ياساقطة..وبعد فترة وافقت..وجاة بابا اول ما دخل سلام عليكوا شوفتوا البت بنت على جابت كام 70% ياعينى الراجل حاطط وشة فى الارض ومش بيكلم حد اصبر على رزق وانا سالونى بنت جابت كام قالتلهم 96%.الا صحيح انتى جبتى 96 ولا 98 .....
يا عينى كان عندوا امل كبير فية ماما رديت بسرعة55 سكت فترة قاله هى مين الى جابت كدة ..بنتك بنتى مين..فقد الذاكرة..انت عندك كام واحدة..راح قال ازاى..ازاى.وكان ساعتها لبس عباية سودة.وقعد يلف ويقول ازااااااااااااااااااااى..قعد يلف زى بتوع الموالد بالظبط..موهبة اول مرة اكتشفها فى بابا..انا كنت حاطط املى فيكى وكنت بشتغل وردية اولى وتانية علشان اجبيلك فلوس الدروس كل شهر وكنت بستحمل كل دة علشانك..ازاااااااااااااااااااااى اتجنن من الفرحه..وكاد من فرحتوا ان يلقى بى من البلكونة.لولة تدخل الجيران انا كنت رحت ضاحية الفرحة القاتلة..وبعد شوية وشة احمر وقعد يقول قلبى قلبى..زى الافلام العربى القديمة...وروحنا بى المستشفى..الدكتور قال: هو حد زعلوة فى حاجة..انا رديت بسرعى ابدا يادكتور دة انا لسة مفرحة بنجاحى000الدكتور اظاهر قلبة ما استحملش الفرحة وجالوة شلل رباعى..يا حول ولا قوة الابالله...وبعد فترة خرج من المستشفى..وابتدت السنة الجديدة 3 ثانوى وانا كلى حماس بكلمات ماما المشجعة..هتروحى لية لا فالحة فى تعليم ولا شغل بيت..ومخ تخين زى جسمك...محدش يركز فى الكلمة الى فاتت دى..وجبتى لى ابوكى العئ.. روحى ربنا ينتقم منك يا بعيدة دنيا واخرة الهى ما تكسبى...الخ الخ..وانتهت سنة
بكلمات ماما المشجعة دى مع بعض حركات مصارعة..نتيجة 3 ثانوى انا قلت اغير المكان لا ن بيقولوا ما يحسد المال الا اصحابة واكيد اهلى حسدونى..روحت عند خلتى فى المعادى.. وانا دخلت العب على البلاى استشن على لعبة اسمها اسبيرو المهم التليفون رن..خالتو: معقول مش ممكن ..اصلها كانت جيبة مجموع وحش فى تانية انا قلت هتيجى تقولى انى من الاوائل من الجمهورية
اكيد كلكم متوقعين انى اجيب مجموع اقل او ملاحق لا طبعا انا حسنت مستوية وجبت58% يعنى فى سنة واحدة حسنت مستوية 3%..حلو برضوا مش وحش ..وكد العوازل الى كانوا متوقعين سقوطى.. وبعد بابا ما عرف المجموع الكبير دة..جالوة شلل نصفى وبقى يشاور ولغيط دلوقتى لحد ما دخلت الاكاديمية العالية للقطن..وان شاء الله اتخرج مها كتانة قلبوظة..قريب..كل ما اخشى علية يتعصب ويعمل اصوات غريبة ووشة يحمر اكتر واكتر.. وقعد شهر كل شوية اجى فى وشة واقولوا مالك يابابا فى اية مضايقك مالك قولى قولى..وشة يحمر اكتر واكترررررررررررررر...شكلوا كان متغاظ من حاجة اية يا ترى مش عارفة..على العموم الله يرحموا والله كان راجل طيب..سلام عليكوا


67 comments:

safa7_karmooz said...

بتهيسى؟؟؟

اكيد بتهيسى

مش عارف ليه

هههههههههه

ايام ثانويتى مجموع السنتين كان 80% وعلى ايامى ده كان يدخل تجارة حلوان...وحقوق القاهرة ومعاهد...

واخرتها فى حقوق ..:)

rovy said...

مش ممكن يا كيكى بجد انتى مش ممكنه والله خلتينى اضحك رغم كل اللى فيا ربنا يخليكى لنا ويخليلنا خفة دمك ..
الله يرحم باباكى يااارب
دمت بخير ودامت لنا حكاياتك وخفة دمك
تحياتى
rovy

ادم المصرى said...

هاى كى كى بوستك جميل اوى وخفيف مووووووووت ومدونتك لزيزه جدا دامت ليكى يارب ويسعد ديما ياريت اتمنا زيارتك مدونتى وتقولى رئيك فى بوستى

.:.-=- ELGaZaLy-=-.:. said...

ههههههههههههههههههههههههههههه

يا بنت الاية...
ههههههههههههههههههه

طيب بصى هانقد انا بس لما اجى تانى...
هههههههههههههههههههههه

ياسر said...

هههههههههههههههههههههههه
اية دة كلة بجد والله ضحكتيني
يعني افهم من كدا انتي بتهربي
من البيبسي او الشربات
بس لازم البيبسي ياستي الحاجة
مش هسامح فية ازازة صغيرة حتي
ياستي معلشي

دمتي بخير يا ست الحاجة

تحياتي

ana ga3an said...

لله يرحمة فعلا
ويرحم من كان علي قيد الحياة من عائلتك الكريمة

حمادة زيدان said...

هههههههههههههههههههههههههههههههه


يخرب عقلك يا كيكي


ضحكتيني وموتييني من الضحك .. وفكرتني باليوم الاسود بتاع الثانوية العامة

يالهوى كان يوم بايخخخخخخخخخخخخخخخخخخخخخخخخخخخخخخ

انتى احمدي ربنا أنه أنتي نجحتي ... أنا بقي منجحتش اصلا وخبت خيبة كبيرة في الانجليزي وشلته معايا من تانية لتالتة اصلوا انا عشري اوى ... وبعدها شلت انجليزي تانية وتالتة معايا في شهر 8 وفي الاخر نجحت

بس جبت

65 في الميه

والحمد لله دخلت حقوق ونجحت وادينا قعدييين بردوا وخايف اجيب ملحق فى امتحان الحياة

المخبر العام said...

متأكدة إنه كان بيطلع الأصوات دي عشان النتيجة
أصل _بعيد عنك_انا ناس بتطلعها عشان حاجة تانية

عل العموم ..الله يرحمه..لولا تأكدي إن جميع المرحومين في مصر صوتوا للسيد الرئيس

كان ممكن يكون فيه كلام تاني

ملامح مصرية said...

ههههههههههههه كيكى كل دة حصلك مهم سنتين ثانويه العامه عدوا على الخير بس على فكرة كل دة من اخوكى مكانش عارف يحسب مجموعك كويس يا ترى هو كان جايب كام فى ثانويه ؟؟؟؟؟؟؟؟؟؟؟؟

أحمد بكر said...

ينهار اسود يا كوكى فقريه مووووت
ايه يا بنتى ده همووت من الدحك
ياترى هتشلى مين فى النتيجه الجايه ؟
ربنا يستر

Tamer Nabil Moussa said...

3 فى المية ياكيكى نهارك مش فايت ياكيكى ههههه

هما دول الزيادة اللى قدرتى عليهم هو دة اخر تشجيعى ليكى اعمل فيكى اية اعلقك من ودانك على الحيطة ههههه

تحياتى

just me said...

ههههههههههههههههههههه

فكرتينى بالذى مضى يا بنتى والله
انا كان يوم النتيجه بتاعتى ده يوم

بس الصراحه ماعملتش اللى انتى عملتيه ده خااااااالص

والله الثانويه دى بالنسبه للجامعه لعب عيال

اييييييييييه دنيا

كلام على بلاطة said...

ولا يهمك
كل ثانوية وانت طيبة

رحاله said...

هههههههههههه
والله ضحكتينى وانا مخنوووقه ع الاخر
مش تتنسى ابدا صح
ههههههههههه

يوميات فنانه مفروسه جداا said...

ههههههههههههههههه هههههههههه
مالكيش حل والله

حلوه اوي يا كيكي

سلام يا جميل

Unknown said...

يعني بجد تعبتي هاتقطعي نفسك ولا ايه

55% في سنه تانيه و 58 % في سنه تالته هاتعملي ايه تاني

بس باباكي مالوش حق يعني اه الحدث يفرح او و يجنن من الفرحه و الفخر بيكي بس كان يستحمل بردو مش عارف ان بنته عبقريه

انا كنت جايبه 94% و كنت ادبي فحطيت رجل علي رجل طبعآ و اتنكت علي مصر كلها

البوست جميل جدآ جدآ

تحياتي يا قمر

Anonymous said...

هههههههههههههههه

اقول ايه انا كنت هقع من الضحك

وبعدين يا اما كنتى بتلعبى يااما بترقصى
امال احنا نعمل ايه وانا بكتب دلوقتى

ومعايا امتحان لبكرة

وليسانس

بس احسن حاجة انك فكرتينى بأيام الشقا

بس انا جبت 66فى تانية وكانت مصيبة

مش متعودين

بس فى تالتة جبت 85

يارب تنفعى فى معهد القطن بتاعك

وربنا يساعدهم

almasry said...

اسلوبك فى العرض جميل


لكن مخبيش عليكى انتى فاشله .. فاشله . فاشله


المفروض كنتى تاخدى أخوكى قدوه .. ومفيش داعى تسألينى انا كنت عامل ايه فى الثانويه ... وأحب اقولك انى آداب

كيكى عوووووو said...

safa7 karmooz...
اولا منور والله..انا فعلا لغيط دلوقتى معرفش هو حصلوا كدة لية..بس شكلك انت عارف...80% ايوة ياعم الموس..منور
روفى حبيبة قلبى من جوة...
ربنا يخليكى ليا يارب00اية بس الى فيكى..ماتشليش هم ربنا معاكى...دومتى بخير حبيبتى

كيكى عوووووو said...

ادم المصرى...منور
ربنا يخليك ومدونتك جميلة اووى

الغزالى الكبيرررررررررررررررر
منور ياباشا...هتنقد لية بس هى معجبتكش ولا اية..زيارتك على عينى وراسى....ماشى هستنك

كيكى عوووووو said...

ياسر....
باشا...حفيدى كمان..متخفش هجبلك عصير قصب حجم صغير..اى خدمة..واروحة كمان يلاا فرح..ستك الحاجة
ana ga3an
منورررررررررررر...ربنا يرحمنا كلنا...بس لية حسستنى انى ابتلاء من عند ربنا...منور

كيكى عوووووو said...

حمادة يا جامد...
منور..ياباشا..الحمد الله على كل شى..انت بتحب الانجليزى للدرجة دى..بس فى الاخر جبت برضوا مجموع اعلى من...بتغزى العين ولا ايييية
المخبر العام...
ازيك..انا بكلم وانا حطة جرنال مخروم..علشان ارقبك انا كمان..متخفش مفيش كلام تانى

كيكى عوووووو said...

ملامح مصرية...
منورنى دايما والله...اكيد اخويا جاب 100% مش اخويا منور والله على طول
بيكر..صاحبى ازيك...ربنا يستر بجد

كيكى عوووووو said...

تامر..باشا..متزعلش هعدها منزال علشان خاطرك وهحاول ازود مجموعى 4%..علشانك انت بس
لست ادارى...
ازيك ياعسل..عاملة ايية على رايك اييييييييييييية دنيا

كيكى عوووووو said...

كلام على بلاطة...
وانت طيب ياباشا..منور على طوللللللللللللل

رحالة حبيبة قلبى...
مخنوقة من اييييية..ربنا معاكى..شدى حيلك فى الامتحانات..عمرى ما انسكى..حبيبتى

كيكى عوووووو said...

يوميات فنانة مفروسة..
عاملة اية فى الامتحانات..ربنا معاكى..انتى الى ملكيش حل والله..منورنى دايما
ايمى يابت يا عسل انتى...
94% يامفترية بتغظينى ولا ايية اللة يكون فى عون بابكى

كيكى عوووووو said...

الاديب العاشق...منورنى دايما
شكلك مووووس جامد..يابن الاية غظنى غظنى..
يارب افلح فى معهد القطن يارب...
ربنا معاك فى الامتحان يارب...
المصرى...
منور ..اية الكلمة الغريبة دى..يعنى اية فاشلة....اداب اةةةةةةة..ياجامد..منور ابقى تعالى تانى

Unknown said...

انا جيت هييييييييييييه هييييييييييييه انا خلصت انتحارات وخدت افراج زرغدى يا بت يا كيكى انا مش مصدقة نفسى .... المهم باة دة حلم دة وللا ايه بالظبط؟؟؟ نتيجتك امتى يا بت يا عسل انتى ؟؟ وحشتينى موووووت

Eldebug said...

هههههههههههههههههه
ايه ده 55 % ده انتى جامدة اوى على فكرة ... واضح كمان انك كنتى بتكتبى جنب كل اغنية اسم المؤلف والملحن بتوعها

Diyaa' said...

ليا في ذمتك كومنت
كتبته وراح
بس بجد الحاج الوالد احبط بالشكل ده وبتتكلمي مستغربة ؟
متعرفيش إن البني ادم مش بعقله ولا بقدراته..بمجموعه وبس ؟!
وبعدين طالما عارفة إنك ملكيش فيها أخدتي دروس ليه وضيعتي شباب الراجل هدر
هاهاهاهاها
بجد مسخرة
أنا شخصياً لما جبت 85% في تانية ويئست من الهندسة..قمت مشقلب ادبي وعشت حياتي طول وعرض بقي صياعة ولعب ..ويا دوب كملت السنتين 80%..يا دوب
حقوق للأسف :(

Coca said...

هههههههههههههههههههههههههههه
انتي سسسسسسسسسسسسسسسكر بجد

الراجل مالوش حق مش فاهمه انا ايه اللي كام مضايق باباكي
هي في ناس كده يا شيخه

بس عجبني اوي اوي انك اجتهدتي وحسنتي مجموعك قطعتي الكتب تقطيع

الثانويه ياريت ترجع تاني علشان العيال اصحابي الله يرحمهم كانا شله بلطجيه جامده
بس الاهي لا يرجع امتحاناتها

سكر سكر يا كيكي

عًٍمًرٌٍوٍ آلنْوٍبٌَِى said...

ههههههههههههههههههههههههه
انا مش عارف امسك نفسى من الضحك
وربنا خلاص بطنى وجعتنى مع ان ابوكى صعبان عليا
بس هنقول اية يابنتى الحال من بعضو
الظاهر كل الابهات مكتوب عليهم كده
بس بجد انتى مشكلة كبيرة اوى
هههههههههههههههههههههههه
كاتبة البوست بطريقة تجنن

تحياتى ليكى
وسلميلى على دوده القطن

واتمنى انك تشرفينى فى مدونتى المتواضعة

مدحت محمد said...

انتى مشكلةةةةةةةةةة
بجد

مقدرتش امسك نفسى من الضحك من اسلوبك

بجد ربنا يرحم باباكى

يارب

""""" said...

دا انتى ليلتك كانت ليله
فكرتينى بليلتى
اهى كانت شبه دى
الحمد لله ان ايامها راحت
ومش عايزه افتكرها
انا بقى ياختى كنت جايبه فى تانيه 97% جيت فى تالته وخبت خيبه اويه وجبت 93% ميعملوش حاجه طبعا
المهم يعنى اخرتها كلية علوم

هى الثانويه العامه دى ليها ذكريات عند كل الناس متتنسيش

انا كنت بشرب عصير قصب ما اجيب النتيجه
تصدقى برضه كرهته !

RaRa said...

مساء الخير
البوست جميل بجد رغم قرف الثانويه العامة لكن مضحك
وربنا يرحم والدك ويرحمنا جميعا

يسعدنى تشريفك فى مدونتى

تحياتى

rovy said...

ايه اخبارك يا كيكى وايه اخبار النتيجه ابقى طمنينى

ربنا معاكى ويااارب تفرحينا
تحياتى
rovy

Tamer Nabil Moussa said...

انتى فين ياكيكى

تحياتى

Tamer Nabil Moussa said...

؟؟؟؟؟؟؟؟

همسات دافئه said...

ههههههه
اديتى رقم جلوسك لخالتك وللجران ووقفوا يقولولك الكارثه ده من الشباك
دا انا حلفت بايمنات المسلمين ما حد عارف النتيجه قبلى
بس اطمنى يابنتى باباكى على الجنه من غير حساب ان شاء الله
هههههههههه
سلام بقى لحسن اتحسرت على حالى
شيماء:)

أحمد بكر said...

ايه يا بنتى مش باينه بقالك كام يوم طمنينى عليكى يا كيكى

tamer.sala7 said...

والله العظيم انتي عسل

لو عندك وقت ممكن اكتبلك قصتي الفظيعة مع الثانوية العامة بس ممكن اختسرهالك في كام سطر

المرحلة الاولة 51 في المية بعد ما سقطت سنتين ودخلت امتحان الرياضة 6 مرات وفي الاخر جيبت 21 مع اني كنت بذاكر

المرحلة الثانية مكنتش بذكر وقولت فشل بفشل اقضيها شغل بقي وخلاص فوجئت بنفسي جيبت 89 بعد ما غشيت في كل المواد


ومن هنا القاعدة بتاعة ذاكر تنجح غش تجيب مجموع

كيكى عوووووو said...

انجى ...
لووووووووووووووووووووووو زغرودة عاملة اييية النتيجة مش عارفة بيقولوا النهاردة انا عندى اسبوع وتطلع ولا كانى فى حضانه..المهم الامكنش حلم دى الحقيقة المرة اهى اهى

eledbug
منورررررررررر...وكمان طلعت سنة كام هههههههههههههههههههه

كيكى عوووووو said...

diyaa..............
دعاء الكومناتت..
فين الكومنت ياخال..الكومنت راح فى الوباء..وك وك ووك
ياعم دى مصر كلها حقوق انا قلت ابقى مختلفة....منورررر والله
كوكا الحبوبة...
عاملة ايييييييى منورة والله...شوفتى ازاى انا مجتهدة هههههههههه

كيكى عوووووو said...

عمرو النوبى ...
اهلا وسهلا بيك...
منورنى..لية الشرف انى ازور مدونتك..
شوفت ازاى انا مجتهدة..هههههههه

مدحت محمد...
باشا منوررررررررررررر....ربنا يرحمنا جميعا...بس على فكرة انا بلسم خالص...ههههههه

كيكى عوووووو said...

amal...
ازيك يا قمر اهلا وسهلا بيكى..انتى بتغظينى ولا اييييييييييييية....
ابقى تعالى تانى

rara.... ازيك
منورنى..انا الى يسعدنى ازور مدونتك...
وربنا يرحمنا كلنا.ههههههههههههههه

كيكى عوووووو said...

روفى....
عاملة ايييييييييييية ياحبيبتى ..كويس انك سالتى علية علشان افتكرتك نستينى...ربنا يستر على النتيجة...
تامر...
بخ انا جيت...ههههههههه

كيكى عوووووو said...

همسات دافئة..
ازيك ياقمر عاملة اييييييييييييييية...منورة جدااااااااااااااااا.....شوفتى ازاى انا ناصحة هههههههههههه...

بيكر صاحبى....
بخ انا جيت

كيكى عوووووو said...

tamer..sala7
منوررررررررررررررررر...الجزء الاول من تعليقك كنت لسة هقولك..كدة احنا اصحاب واخوات..لكن لما شوفت الجزء التانى 89 انسى..خلاص.بتغظنى صح ..هههههههههههههه ..والله انت الى عسل

ادم المصرى said...

كيكى اذيك بقولك ياقمر انا نزلت جزأ تانى من اميره بكل النساء اتمنا تعلقيقك الهام

Hosam Yahia حسام يحيى said...

ياااااااااااااااااه

كل ده بيحصل فى مصر وانا مش عارف

:d

عموما كل ثانويه وانتى طيبه وعقبال اولاد اولادك بس يبقوا يجيبوا 105 % وانتى تبقى زعلانه برده انهم مش جابوا مجموع كبير

:d

تحياتى

عروسة ننوسة said...

والله حرام عليكى باباكى ذنبه فى رقبتك يا مفتريه......لكن قوليلى هى الاكاديمية دى بتخرج ايه منجدين!ههههههههههههههه دمك شربات يا كيكى

Unknown said...

ايه يا بنتى فينك ما تيجى تزورينى باة وحشتنى تعليقاتك وخفة دمك... يللا تعالى انا جبت الحقن

شمس said...

هههههههه

ايام الثانوية والسهر لحد الصبحية وفى الاخر فشلة ههههههه


انا مدون جديد

وعايز تشجيع

تحياتى

عبسميع said...

دا انا هحقد عليكي بقي
إيه المجاميع دي يابنتي

يعني الواحد مش عارف يتكلم
أنا اتشليت يا ولاد -من كتر الضحك طبعًا-

مدونة جامدة جدًا أنا خدت فيها كام لفة علي السريع مع وعد بالعودة

تحياتي
محمد

دعاء مواجهات said...

ربنا معااكى ياارب

ويحققلك اللى بتتمنية

شدى حيلك بس

تعالى نزلت بوست يستاهل بقك

سلاام

Coca said...

انتي مكسله تردي علي كل تعليق لوحده يا كيكي
فاشله فاشله يعني
داانا جالي حول لحد ما عرفت انتي رديتي في انو تعليق

Unknown said...

عارفة يا كيكى لو طلعتى بعد الغيبة دى بتصيفى من غير ما تقولى وتاخدى الاذن من جمهورك وتقولى انك هتغيبى كدة هاعمل فيكى ايه؟؟ ولا حاجة هاقولك انبسطى؟؟

كيكى عوووووو said...

ادم المصرى اذيك...
لسة جاية من عندك...بجد والله حلوة اووووووووووووووى

حسام يحى اذيك يامعلم عامل ايييييييييييىة..ماشى ماشى اولاد اولادى انت خيالك واسع اوووووى هههههههههه تسلم ياغالى

كيكى عوووووو said...

جنة الحلوة اذيك...
طبعا انا هبقى اول منجدة فيكى يامصر ههههههههههههه

انجى...
جاية حالا انتى وحشتينى اوووووووووووووووووووووووى

كيكى عوووووو said...

شمش...
اهلا بيك...بيب بيبي عوووووووووو هيييييييييييييية حلو التشجيع دة....منور وثوانى وابقى عندك


الديلكيون...
منور بس يعنى اية اسمك الغريب دة....هستنك ومنورنى والله..تحياتى ليك يا باشا

كيكى عوووووو said...

دعاء مواجهات...
ازيك يا قمر ..ربنا يخليكى....دقيقة واجى علطوللللللللل

كيكى عوووووو said...

كوكا الحبوبة.....
تعليق لوحدك اهو ياستى ولا تزعلى...عاملة اييييية ياقمر اية اخبارك....عجبنى اوووووى اخر بوست ليكى كان جامدددددددددد....يارب اسعد بتشريفك علطوووووووول

أحلام عمرنا said...

يخربيت دماغ اهلك
ده انيت مشكله
موتي الراجل بحسرته
حسبي الله ونعم الوكيل
بيتهيئلي لو كان عايش كان زمانه دلوقتي اتفشخر بيكي قدام صحابه
انك تمتلك مدونه واسعه وشرحه ومعروفه
ربنا يكرمك
خلي بالك من ماما بقى

mohamed ibrahim said...

انتي بتهيسي يا كيكي اكيد بجد
انا ايام الثانوية العامة جبت 95 %
5555555555555555555555555555
اللهم لا حسد
الحمد لله يعني
و انتي بتقولي كل التفاصيل دي بلا مبالاة
و اعتقد ان اغلبها مش مظبوط
روحي اغسلي وشك كدة و فوقي
بس بجد التدوينة حلوة اوي
كانت مضحكة جداااااااا
تحياتي
محمد

نـــــور said...

يخرب بيت عسلك اكتر مدونه ضحكتنى
بجد دمك زى العسل وكلامك مهضو ودمه خفيف جداااا بس عايزة اقولك ايه الصراحة دى كلها ؟؟؟
بس والنبى خلى بالك من ماما بلاش تقوليلها على نتيجه الجامعه
اول زيارة وان شاء الله مش الاخيرة

Anonymous said...

على فكرة جامدة موت كفكرة وسرد
على فكرة انا اسامه صاحب بيكر (ازى اسامه؟)

Anonymous said...

على فكرة جامدة موت كفكرة وسرد
على فكرة انا اسامه صاحب بيكر (ازى اسامه؟)

ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket