Monday, February 2, 2009

أزاى تعرف أنك بتتفرج على فيلم عربى؟؟؟

Monday, February 2, 2009


عزيزى المشاهد اليك بعض الارشادات والنصائح العامة لكى تتعرف على نوعية الفيلم الذى تحبة ومن أهم الانواع التى نستعرضها الان هى الافلام العربية

***كيفية التعرف على الفيلم العربى**

لازم البطل يعرف البطلة ويحبها كمان فى اول عشر دقايق من الفيلم بكذا طريقة وأشهرهم على الاطلاق
ان يكونو الاتنين فى مكان واحد وهى متعرفوش ولاهو يعرفها مرة واحدة يبص فى عينها سبحان الله يطلع شعاع من عينة وهى مرة واحدة شعرها يطير وتلاقى المطرة مطرت رغم ان يكونو فى الصيف ويجريوا على بعض..ونسمع أغنية كنا فى أواخر الشتا لى أليسا!!!1
***********
لازم البطلة تكون أمها أتحرقت وأبوها فى السجن وأخواتها أيتام ..تضرا تشتغل عند واحد فى شركة ويضرا هو برضة انه يعكسها فترفض طبعا وتقول:لا يامجدى باشا مش عشان أحنا فقرا يبقى شرفنا رخيص وتنهار من العياط..وفى أخر الفيلم نلاقيها بتشتغل رقاصة بس بشرفها!!!
**************
لازم أم البطل تكون صاحبه مرض وتقول قبل ماتموت:يامحسن يابنى انا لازم أعترفلك بسر الراجل الى جوة دة مش ابوك ولاعم صفوت البقال ابوك ولاعلى جارنا ابوك ولاميمى ابوك..انا لقيتك قدام معبد يهودى وقلت اربيك وأكسب فيك ثواب روح يابنى دور على أهلك وماتنساش قبل ماتنزل تطفئ نور الصالة وتحاسب على الايجاروتجبيلى من أم محسن الى قصدنا فحلين بصل كانت واخدهم منى قبل أااة أأاااة قلبى قلبى ماتت!!1
*************
لازم البطل يقوم بدور الاب والاخ والخال والعم والجاروالصاحب وصاحب الصاحب والبواب والبقال والام والاخت والخالة والعمة والحبيبة الخ الخ الخ .....,أحيانا المشاهدين
!!!!
*********************
لو البطل أتصاب بطلق نارى لازم وضرورى جداااااااا انه يتصاب فى كتفه وعمرة مايموت ابدااااا والبطلة تجرى عليا وتقول:هتكلم امى امتى وتجئ تخطبنى يامنيل؟؟؟ رغم متفهمش اية علاقة الحوار دة بالمشهد الى عدى..سبحان الله بجد
******************
لمة تسمع جملة:أنا دايخ ونفسى غمة عليا..يبقى الرد:مبرووووك أنتى حامل ولمة يلاحظو ان البطل هو الى قايل الجملة يبقى الرد:مبروك أنت حامل!!!!1
*****************
لمة يكون مشهد وداع بين البطل والبطلة وهى بتكون بتودعة...يفضلوا كل شوية تندهولة وتجرى عليا وتقول أحمد وهو يقول منى رغم ان ممكن اسمايهم فى الفيلم متكنش كدة..!!!1
*****************
لمة البطلة تكلم البطل على الكورنيش ويكونوا قاعدين قاعدة ولامؤاخذة شوية وتقولة: معلش ياحبيبى أتاخرت عليك أصل سوائق مامى جورج الزفت أتأخرعليا..البطل يقول بكل حماس وتلاقى عينا احمرت: جورج مرة واحدة تلاقى وراء البطل والبطلة فى مركبة قسيس وشيخ بيحضنوا بعض

!!!!!!!!
******************
لو البطل رياضى ..لازم تسمع طول الفيلم أغنية:المصريين أهمه حيوية وعزم وقوة..حتى لو أتهزم البطل فى النهاية
!!!
****************
ـــ الى هنا عزيزى المشاهد كانت هذة أهم المقتطفات الهامة لمعرفة ماتشاهدة ونحذرك تحذير هاااام أذا وجدت مثل هذة المقتطفات الابتعاد فورا حتى لاتصاب بالعتة المصاحب بالشلل الرعاش والتخلف الذى يؤدى لمجرد رؤيتك لحمار فى الشارع تجرى وارءة وتقول أخويا أخويا وننصحك بالبدائل أقل ضرر وهى رؤية الافلام الهندية
the end

36 comments:

بنوتة said...

ههههههههههههههه
احييكى على أسلوبك الرائع
وطبعا عندك حق
وعشان كده عمرنا ما هنوصل للعالمية
وعلى فكرة دى مش مشكلة السينما بس احنا مشكلتنا اننا مش بتنازل عن أى حاجة من زمان وبنستمر فيها حتى لو الناس زهقت أو عادة غلط او مش صحية في الحياة عامة
أحييكى ودمتى بالخير

عاشقه وغلبانه said...

هههههههههههههههههههه
ههههههههههههههههههه
ونسيتي البطل صوته حلو بس عايز فرصه وبقدره قادر يبقي مطرب ناجح

ولا البطله الفقيره اللي بتتجوز البطل الغني ومش مهم اي حاجه بعد كده

ده تمثيل يا اختي ماتخديش في نفسك كده
هههههههههههههههههه

M.a.r.y.o.o.o.m said...

هههههههههههههههههههههههههه
هههههههههههههههههههههه
والله العظيم انتي بت فظيعه
ممكن تقولي مجنونة
بجد انتي رائعه وال ايه
لازم البطلة تكون أمها أتحرقت وأبوها فى السجن وأخواتها أيتام ..تضرا تشتغل عند واحد فى شركة ويضرا هو برضة انه يعكسها فترفض طبعا وتقول:لا يامجدى باشا مش عشان أحنا فقرا يبقى شرفنا رخيص وتنهار من العياط..وفى أخر الفيلم نلاقيها بتشتغل رقاصة بس بشرفها
ههههههههههههههههههههههههههههههه

ريمان said...

هههههههههههههههههههههههه


يالهوى عليكى يا بت

بس والله انتى نكته

فزيعه خالث مالث

ههههههههههههه

بس عندك حق حركات الافلام دى مفقوسه اوى اوى

ومش تلاقيها الا فى الافلام العربى بس

ههههههههههههه

عثل

تعالى يا بت شوفى بوستى الجديد اللى مكسر ومولع الرجاله

أحمد بكر said...

كيكى نسيانى خالص هه

Lady E said...

عندك حق يا بت يا كيكي

هو ده اللي بيحصل في الافلام العربيه بس على فكرة الافلام الهندية برضه بتجيب شلل رعاش ومدتها بتبقى 4 او 6 ساعات والاحداث لازم تكون كئييييبة
علينا بالافلام الاجنبي وخلاص

وبعدين قوليلي ايه ثقافة العنجليزي اللي نزلت عليكي دي ايه ذا اند دي انتي بتذاكري وانا معرفش ولا ايه

حسن حنفى said...

ههههههههههههه

الحمد لله اني مش بتفرج علي افلام كان زماني جاالي الحاله دي

:d

خلينا بعيد احسن

مصطفي احمد said...

هههههههههه


زي ما عارفك تمام بس تختلف العووووو

مش بقيتي بتقوليها زي زمان ولا ايه

:d

طبعا انتي مش تعرفيني

احسن

:p

علي العموم

الافلام المصريه فقدت اصلا كل شعبيتها لانها كلها متكرره وبقت ممله جدااا

مصطفي احمد said...

هههههههههه


زي ما عارفك تمام بس تختلف العووووو

مش بقيتي بتقوليها زي زمان ولا ايه

:d

طبعا انتي مش تعرفيني

احسن

:p

علي العموم

الافلام المصريه فقدت اصلا كل شعبيتها لانها كلها متكرره وبقت ممله جدااا

محمد عتلم said...

ايه ده ؟
انا فعلا قربت يجيلى كساح وشلل رعاش وثلاثى واستبحس فيومى
ياخوانا بطلو تتفرجو على عربى من اساسه . ماله الهندى ؟ على الاقل فيه خيال بس مش علمى. بجد المشاهد ليه الجنه بعد الفيلم المصرى عشان فيه استخفاف بعقلية الانسان من مشاهد قديمه وافيهات عبيطه وتصوير عبيط وقصص هبله لالالا ولا الخدع .... تحسى ان لو توم وجيرى يكون افضل واحسن
وبيستخسرو الفلوس فى الانتاج ويعملو ماكتات كرتون وشكلها بيكون زباله والاضاءه تلاقى المشهد معمول فى الصحرا والصحرا كلها منوره .. منورينها بنور العربيات اللى بيروحو بيها تقريبا
بما انى مصور اصلا فأنا حضرت تصوير افلام كتير وكلها هجايص فى هجايص
بس فيه ملحوظه
الجيل اللى ابتدا قريب والجيل اللى جاى والجيل ابو زلومه هيعمل سينما كويسه نوعا ما عشان هما زهقو من التهريج وفيهم ناس دارسين سينما بجد فى ايطاليا وامريكا ده غير ان الجمهور اللى هوا احنا اتغير كتير عن الجمهور اللى فات بتاع السبعينات والتمانينات والتسعينات اللى انضحك عليه فنيا سواء فى السينما او فى المزيكا. انا عن نفسى متوقع ان المواضيع دى هتتغير وده من واقع احتكاكى بالموضوع عن قرب
وكمان فيه حاجه مهمه ان فيه الممثلين الشباب الجداد فيهم ناس احسن من الاجيال اللى فاتت اللى عاملين زى الموظفين .. تلاقى الممثل من دول عنده 50 سنه وكرشه اد كده وشنبه منحكش وقصير او طويل بس جسمه مش متناسق بالمره وعامل دور واحد جان وعنده 25 سنه وحبيب وروش ولابس من عند بى تى ام ملابس للرجال ههههههه
بيكون شكله تحفه والبطله قربت على الستين وتكون بتحب البطل وفى الكليه مثلا وابوها مش موافق على الجوازه دى عشان البت لسه صغيره....ياختى يا نغه

دينا حامد said...

هههههههههههههههههههه
يخرب بيت مخك
بجد انتي رهيييييييييييبة

الجزء ده موتني من الضحك

لازم البطلة تكون أمها أتحرقت وأبوها فى السجن وأخواتها أيتام ..تضرا تشتغل عند واحد فى شركة ويضرا هو برضة انه يعكسها فترفض طبعا وتقول:لا يامجدى باشا مش عشان أحنا فقرا يبقى شرفنا رخيص وتنهار من العياط..وفى أخر الفيلم نلاقيها بتشتغل رقاصة بس بشرفها!!!

بجد دمك زي السكرررر

تحياتي

حمادة زيدان said...

كيكي كيكي كيكي كيكي كيكي كيكي كيكي

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

دمك زي العثل والله

نسيتي شوية حجات تانية
لما تلاقي البطل والبطلة جيران ولازم طبعاً إما يكون واحد مجبتوش ولادة ويفضل يحب فيها لغاية ما الفيلم يخلص أو أنه يكون شراني ويفضل يرخم على امها لغاية ما تتقندل تتجوز ابن خالة عمة أمها اللى كان مسافر في كواللمبور ورجع وشافها صدفة وحبها من اول نظرة

ولا
ولا
ولا
الامثلة كتيرة وتجيب للواحد القرف لو قعد يحكي عنها بس نقول ايه
هو ده الفيلم العربي
وأكشـــــــــــــــــــــــــــــن

سلاموزات على طول السلام

الحرامي said...

الكلام دا لو انتي بتتفرجي علي فلم قديم
اما لوبتتفرجي علم فيلم جديد اللي هو الشبابش ولامؤاخذه
يبقي تضيفي الاتي
لازم البطل يكون واد دماغه متكلفه وبيشرب شتي انواع المخدرات
وكمان لازم يكون بتاع ستات ويتوب اول ما يعرف البطله

ولد مصري said...

حضرتك الأفلام دي بطلت خلاص

وبعدين لازم حضرتك تقولي إنتي بتقصدي أنهي حقبة تاريخية للسينما المصرية

لان فيه أفلام مصرية زي الفل وخصوصا بتاعة إست فاتن حمامة وسي الدلعادي يوسف بك وهبي

على أي حال أنا أنصحك بالفرجة على أفلام السيدة الفاضلة إيناس الدغيدي علشان تعرفي قيمة الأفلام اللي مش عجباكي دي

وبالنسبة للأفلام الهندي ان شاء الله أول ما ألاقي عندي سبع ساعات فاضيين هروح أتفرج على طول وخصوصا المشهد بتاع قتل الزوج واغتصاب الأم قدام ابنها اللي بيكون في أول الفيلم على ايدك الشمال وانتي داخله في قصر المهراجا على طول

تحياتي

البت المشمشية حلوة بس شقية said...

هههههههههههههههه
ضحكتينى يا بت انتى
منك لله
ههههههههههههه

Zika said...

عوووو
اه والله دي افلام عربي
وتمشي هندي كمان

mo5tar said...

هههههههههههههههههههههههههه

جاااااااامد الكلام ده

وفعلاص هى دى الحقيقة المرة

علشان كده مبقتش بحب اتفرج على افلام او مسلسلات عربى

نيهاهاهاهاها

ضحكة شريرة برضه

تحياتى

maiosha said...

ههههههههههههههههههههههه
هههههههههههههههههههه

بت يا كيكى بجد انتى مشكلة
كل مرة أبقى نفسى أعلق تعليق محترم ومش بقدر من كتر الضحك
ههههههههههههههههههه
هههههههههههههههههههه

Anonymous said...

ههههههههههههههههههههههه
هههههههههههههههههههههههههههه

و الله أنتى فظيعة بجد

بس كمان نسيتى تقولى إن دايما البطل و البطلة يتجوزوا و هما فقرا و من غير سبب نلاقيهم آخر الفيلم من اعضاء المجتمع الراقى

Radwa said...


كيكى
ازيك والله وحشانى
على فكرة هى مش مجدى باشا انتى حديثة اوى هى مراد بيه أو عادل بيه
وحلوة الرقاصة اللى بشرفها دى من البيت للكابريه ومن الكابريه للبيت
..................
صـدى اختنـ سندريلا ـاق

بنت مصريه said...

ههههههههههههههههههههههههههههههههههه
لا دا فيلم عربى مأصل
تحسى يا كىكى انه سيناريو محفوظ ف كل فيلم
ههههههههههههه
جميل قوى بوستك يا كىكى
احييكى

Muhammad Mammdouh said...

مفيش الوقتى دايخ ونفسى غامة عليا بقى فى الوقتى دوخة زغلله كرشة نفس
والله انتى عسل وطرقيتك لذيذة
تحياتى

Ehab said...

هأو أو أو أاااااااو

يا بنتي لازم تفهمي الحكمه منوراء كل ده
لازم البطله ترفض معاكسة البيه في الأول وبعدين تشتغل رقاصه في الأخر يعني من الأخر يا بشر متعملوش فيها اشراف علشان هتعملوا اللي احنا عايزينوا شئتم ام ابيتم

متستغربيش ان البطل بيقوم بكل الأدوار علشان لازم تعرفوا ان من حقه يشارككم في قوتكم وقوت عيالكم وكل حاجه ياخدها في كرشه فاهماني انا بتكلم عن مين طبعا
عماد حمدي يعني

متستغربيش ان البطل مش بيموت والرصاصه بتيجي في كتفه بس
يعني اللي هيفكر يعمل حركه غدر ويقتلني مش هاموت وهتيجي في كتفي واتعالج وارجع اطلع عين ابوكم

متستغربيش من اي حاجه في افلامنا
لأنها رساله مشفره لعقولنا الباطنه بس احنا مبناخدش بالنا
وسلميلي على اميتاب باتشان

سلااااااااااااااااااااااااام يا مصيبه
اخوكي ايهاب

أبو العريف said...

نسيتي كمان ان عماد حمدي لازم ييجي يقول مساء الخير يا نينه حتي ولو هو مش بيمثل في الفيلم والفيلماصلا ما فيهوش نينه
كمان والباشا البطل لازم يعمل خناقه كبيره والكراسي تتكسر وقبل ما يكلم اللي بيضربه تلاقيه بيقع



علي فكره بقي انا عامل بوست وبقطع فروة سيادتك فيه وخايف تشوفيه تعملي فيه زي الابطال في الافلام العربي

م/ الحسيني لزومي said...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

Kiara said...

ههههههههههههههههههههههههههه


فيلم عربي عربي موش اي كلام يحني

وحشاني يابت

مهرة سالم said...

السلام عليكم...
بجد إنتي تحفه ...
......
بس فعلا ليه البطل والبطله مش بيموتو
والبطل طول عمره بيتصاوب بدراعه
........
ونصيحه جميله جدا
الأفلام الهنديه...
على الأقل كلهم بيطلعوا أهل بالآخر
مش زي إلي لقيته بالمعبد
......
عسسسل يا عوووو
دمتي بخير

yoyo said...

هههههههههههههههههههههه
ههههههههههههههههههههه

لا بجد انتى مش ليكى حل زى السكر والله
و الله انا بقيت اقول على العربى دا افلام هندى بس متعربة بقى
دايما عارفين اللى هيحصل و نفس الحوارات و الدراما اللى تحسسك انك لا مؤاخذة يعنى ....ولا بلاش للاحسن يزعل برده ههههههههههههههه

حلوة رقاصة بشرفها دى ههههههههههههه
من البيت لكباريه و من الكباريه للبيت بترقص بادب بقى و نعمة الشباب و الله

فى اولى زياراتى لمدونتك بجد اسلوبك جميل و مدونتك لذيذة اوى ان شاء الله يدوم بينا التواصل يا كيكى

تحياتى
يويو

(احمد سكر ) said...

هههههههههه


داانتى شركتى افلامنا كلها خاالص

لاء وبيقولو علينا احسن ناس نعمل افلام

بس بنأفلم على بعض بس

هههههههه

تقبل مرورى

احمد

mostafa rayan said...

يا ملاحظاتك الجامدة يا كيكي

Mkjwe said...

انا مابحبش الأفلام العربي كتير , مافيش حلقة مخصصة لأفلام الانجليش بليزز يا اسمك اية انتي النهاردة

أنا حر said...

ياطولت بالك
بصراحة انا بطلت اتفرج من زمان على الالام دي يعني لقيت ان سبيس تون افيد كتير
:)
تحياتي

Heba Sayed said...

اسلوبك رائع فى الكتابة يا قمر

وحقيقى البطل يحب البطلة عن طريق الصدفة والنهاية حزينة او سعيدة مع حبة مناظر مش اللى هى عشان يجيب ايرادات

وياصباح الذنوب

ربنا يهدى الجميع

دومتى بخير ياقمر

ميرو انتكة said...

ازيك يا جميل

اسلوبك لذيذ قوى بجد وشكلك عسولة قوى

بس عارفه انا بحب قوى الافلام العربى القديمة


سلامة سلامة سا جميل

حسن حنفى said...

ايه فينك

اختفيتي ليه كده؟

princess said...

هههههههههه
ده اللى بتقوليه ده اقل حاجة
حاجة ملل بجد

ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket