Friday, June 4, 2010

خالتى بتسلم عليك

Friday, June 4, 2010
مممممممممممم؟
مممممممممممممم!!!
وبعدين!!...أكيد هتكلم متخافوش بس أصلى مش مستوعبه الى هكتبوا
وكمان البوست ده شخصى بحت فأنا مش عارفه أبتدى ازاى ماعلينا
من يومين خلصت أااخر امتحانات نظرى ليا فى الاكاديميه العاليه للقطن أنتو متخيلين؟؟
كانت ليله أخر ماده دى كنت عامله أزاى!!! أنا كنت عمالة أبص للقلم وأقوله بودعك اه اخر وداع بودعك كنت زى المسحورة يعنى مفييييش لجنه هقعد فيها تانى ومش هعقد ليله كل امتحان أقر القران عشان ميكنش رقم جلوسى فى أول بنج!! لان المراقبين بيعزو اوى الى فى أول بنج تلاقيهم قاعدوا جانبك وحبكت بقى يتوبوا ويستغفروا ربنا فى الوقت ده يااااااه يعنى صوتى مش هيتنبح من كتر البسبسه للجانبى ولاهحدفوا بحاجه فى نفوخوا عشان ساعات مكنش بيسمع ولا هخبى تانى البرشام فى فرده الجزمة وبوقى!!وأول مايجئ حد على طول من غير تردد احدفوا ع جانبى ولا هظهر تانى مواهبى الخفيه يعنى لمة بيكون فى سؤال صعب المواهب بتظهر كتير اوىفى اللجنه
قبل كدة فى سؤال أجابتوا كبيرة اوى وكان المفروض أنه مهم بس مجاش فى الامتحان وانا حفظتوا طبعاااا كلكم بتقولوا انى كتبتوا رغم انه مجاش!!أنتو فاكرنى متخلفه أكتب سؤال مجاش لاطبعااااا كتبتوا فى الماده الى بعديها الى ملهاش علاقه بالحوار اصلا ياجماعه لازم تفتحوا دماغكم شوية أسيب الورقة فاضيه يعنى
ولا الشيتااااات والابحاث يااااه كانت موال مقرف كانت الدكتورة بتاعت محاسبة أنجلش قالت اننا نكتب المحاضرات كلها نجبها مع الشيت عشان نأخد اعمال السنه انا بقى لسه هكتب روحت صورت مسئله من الكتاب وصورتها نسخ كتير اوى عملت رزمه وسلمتها بنت الايه بقى قالت بعد ما سملنا الى كتبلى الملغى الى لغيتوا فى الفصل الاول هعرف انه مكنش بيحضر....مابالكم انا
اه صحيح يوم الماده دى أنا مكنتش عارفه أقرء الاسئله فكنت معلمه كل سؤال بكلمه وللاسف الكلمة مجبتش فجتلى هستريه ضحك فاكرين اللمبى لمة كان بيمتحن والست العجوزة أقعدت تضحك انا عملت كدة برضه أهى أتجنينت من أول سؤال
**أنا فتحت فى الكلام معلش كبت أربع سنين.....أنا كانت أكتر حاجه بضايقنى لمة حد يعرف انى فى أكاديميه خاصه وكدة ع طول ومن غير تردد الاقى الى قدامى يغمزلى ويقولى أيوة ياعم بتنجحوا بفلوسكم والله العظيم انا بحس من خلال كلامهم ده اانى خلال الاربع سنين كنت بتعلم فى كيفية رسم كوز الدره!!!؟
أنا نقصلى مشروع التخرج الى هو عباره عن تلوين كوز الدره !!؟
أنا كل ما افتكر المعيد الى كان بيساعدنا وشغل المخابرات الى كنا بنعملوا عشان محدش يعرف رغم ان معروفة فى رابعه الكل بيأخد دروس مع المعيدين بس اهى افلام بقى وانا كنت بموت فى جو المخابرات ده أول ما أتفقنا ع الدرس وكدة أتقابلنا فوق فى المكتبه بنسألوا ع الفلوس وكدة كان الاول يبص يمين وشمال ويقولنا أشششششش ويكتبلنا ع الورقة وأحنا نرد بالاشارات!!!وهو فعلا ناصح كنا بالطريقة محدش خاااااااالص بيأخد بالو مننا
تحسوا جو كل فرد مصرى مخبر أمن دوله صميم صميم يعنى بيظهر فى الاوقات الحرجه ولمة كنا نأخد منه الفلاشه كان يلفها فى ورقه ولازم برضه قبل مايدينى الفلاشه يبص شمال ويمين ويقولى كلوا المعلومات الى طلبتوها هتلاقوها هنا!!وأنا كنت أتجاوب معاه وكنت بعيش اللحظة وتقمصت دور أبلتى ناديه الجندى كنت قبل ما أطلب اى طلب منه أقوله:خالتى بتسلم عليك وأروح حاطة الطرحه ع وشى وأسلموا البضاعه أقصد الفلاشه وأجرى قبل أى معيد تانى يحفظ ملامح وشى!!!لان المعيدين منفسنين من بعض لان لو اى حد فينا أنكشف الخليه كلها هتقع ومهمتنا القوميه هتفشل بس رغم فى أفراد فى المجموعه كان نفسى انا الى أبلغ عنهم واخد المكأفاه بس يلا الله يسهلهم وكلوا هيطلع ع عينهم فى المناقشة لان ربنا بيسلط أبدان على أبدان أصل انا جنيس المجموعه ياخوفى يابدران أخش على دكتور جلال أقوله أمال فين أبو سلكه؟!!!! أصل مخدناش ده فى الكلاااااااااااااااس
جسمى أشعر من الذكريات وأفتكرت الاغنيه الى هنقولها بعد المناقشة: وحوش فى البر وحوش فى البحر بحررررريه بحريه بحريه....هتوحشونى ياوحوش رغم الذكريات الى منيله بنيله الى بينا
وبمناسبة أنى نتيجتى بتطلع ولا الشهاده الابتدائيه خلال أسبوع أحب انهى البوست زى أبلتى ناديه الجندى فى أفلامها
لااااااااااااااااااااااااااااااااااااااااااااااااااااااااااااااااااااا
لاااااااااااااااااااااااااااااااااااااااااااااااااااااااااا

38 comments:

♥♥ شذا ♥ الروح ♥♥ said...

وحشتنى يا طنط


اخبارك ايه
يارب تكونى بخير

♥♥ شذا ♥ الروح ♥♥ said...

لولولولولولولو

وطلعت اول تعليق

ايه الجمال ده

هههههههههههههههههههه

♥♥ شذا ♥ الروح ♥♥ said...

هههههههههههههههههه

الصورة تحفه يالهوووووووووووووووووووى

عليكى افكار تجنن وربنا

♥♥ شذا ♥ الروح ♥♥ said...

ههههههههههههههههه

المهم انك خلصتى والحمد لله ووداع بوداع

ربنا يوفقك يارب ويصلح حالك
ويكتب ليكى السعاده يارب

Anonymous said...

ياللمهزله

فكرتيني بالذي مضي

كانت ايام بنقعد دلوقت ونقول كانت احلي ايام

مع انها كانت ايام سوده

بفتكر الخن اللي ف الفيوم

وبفتكر المشاريع والابحاث

واحلي حاجه لما اقول للرجاله

تيجو نكنسل البحث ده

الاقي استجابه رهيبه

وللا لما كنا بنعمل بحث انا ونور

ونفضت وقعدت رسمت صوره وهو يتفرج علي













بعلق بغير معرف زيك
رخااااااااااااامه يعني
هههههههههههههههههه

اكيد عرفتيني

Tears said...

البوست جميل جدا و دمك خفيف كالعادة

بس بجد لم اتخيل ان كل العفرته دى ممكن تكون فيكى فى لجنة الامتحان...ده انا كنت بحب اقعد قدام مخصوص عشان بيكون اهدا مكان و مافيهوش ناس بتتلفت حواليها بس انتى لفتى نظرى لحاجات تانية خالص

عموما مبروك انك خلصتى امتحانات و تمنياتى باجازة ممتعة :)

nigro said...

كفارة يا معلم
ماغلطتش أنا يعني لما قولتلك تناقشي و تروحي تقدمي ورقك في المخابرات وش
يا بنت الإيه
أتاريكي كنت بتتدربي على العمل المخابراتي في الأكاديمية
مجرم مجرم على حق يا كبير
عملت إيه مع باقي الخلية بتاع المشروع
:)
اتفقتوا على الخطة و الأسماء المستعارة و كلمة السر ولا لسه

ربنا يوفقك يا وحش

خلص الكلام
صباحك جبنة قريش .. علشان الريجيم


سلامـُـه عليكم

هوبتي said...

ههههههههههههههههههههههههههههههههههههههههههههههههههههههههههههههههههههههههههههههههه

ضحكتيني بجد وفكرتيني بنفسي في سنة التخرج
انا كنت زايك كده في تجاره واكاديميه خاصه وكان الكل بيفتكر اني بنجح ببلاش برغم اني كان بيطلع عيني ونفس حوار الدروس دا كنت بشوفه علي فكره

انا اول ما خلصت الجامعه جات ليا حالة من الاكتئاب بس مش حابه اتكلم عنها ههههههه لاني بتعب زياده هههههههههه

اما موضوع الدكاتره انا مره قبل الامتحان باسبوع نزلوا لينا كتاااااب جديد في مادة القانون ولغوا الكتاب القديم تخيلي بقي كان موقفنا ايه؟
انا بقي في الامتحان دا سبحان الله ماشترتش الكتاب الجديد ولا ذاكرته وحليت الاسئله من المنهج القديم وسبحان الله الوحيدة في اللجنه الي نجححت في الماده دي كنت انا هههههههههههههههههههههههه

سمع هوص (Abo 3li) said...

ربنا يستر بقي علي النتيجة.. يبقي فرحينا...

وعمتي بتسلم عليكي..

!! a7mad sala7 !! said...

ههههههههههههههههههههههههههه

كلها اسبوعين تلاتة واعمل زيك كده :D

ســـهــــر said...

هههههههههههههههههه

يااااااااه فكرتينى بالذى مضى

عجبنى حوار الفلاشة دة اوى
ههههههههههه

ان شاء الله تنجحى يا قمر
انتى وكل الناس الحلوة اللى بتدرس

ســـهــــر said...

هههههههههههههههههه

يااااااااه فكرتينى بالذى مضى

عجبنى حوار الفلاشة دة اوى
ههههههههههه

ان شاء الله تنجحى يا قمر
انتى وكل الناس الحلوة اللى بتدرس

سواحة said...

كفارة يا خالتو :-)))
الا الكوز الذرة فيه كام حباية ؟؟؟؟؟؟

اعتقد ان علشان تخذى الماجستير لازم تحددى اشكلهم الهندسية

و علشان الدكتوراة تقولى الزرعة فيها كام ورقة :-)))

كله تعليم :-)) دلوقتى نشوف خالتو كيكى فى ساحة العمل و نتفرج على البوستات يا خالات :-)))))))))

اميرات الاسرار said...

ههههههههههههههههههههه

والله العظيم ضحكتينى وانا مضايقه وصعب اضحك
بجد بوست جميل وربنا معاكى يارب

اميرات الاسرار

Single Mummy said...

مبروك يا جميل انك خلصتى الامتحانات وعقبال النتيجة
اول مرة ازور مدونتك بس بجد جميلة وعجبتنى جدا
تحياتى

أبو كريم said...

بجد حسيت انى بمتحن ومش مذاكر من البسبسه والمراقبين الى بيتغفروا والبراشيم

ألف مبروك نهايه المذاكره وعقبال النجاح

سلام

مدونه ما كفايه بقى said...

روحك جميله اوى

بس والنبى ما تنسى تسلميلى على خالتك
ومتنسنيش فى البضاعه
تقبلينى صديقه لمدونتك

والسلام ختام

Me7'o said...

كلمة السر إيه بقى لما كنتوا بتسلموا وتستلموا الأمانة

يوم ورا يوم
حبيبى
ما جانى يوم
حبيبى

أنا عمرت ما كنت بغيييييييب

Remas said...

كيكى ازيك ياتوتة

الحمد لله انك خلصتى امتحان
وان شاء الله بالتوفيق والنجاح ياقمر

انا عجنى او جو السسبنس بتاعك انتى والمعيدين دا
ههههههههههههههه
بجد انتى عسوله خالص ودمك زى السكر

just waiting said...

هههههههههههههههههه
ايه جو الرعب المنفسن دا انتو كنتو بتتعلمو حرب الجواسيس ولا ايه

♥♥ شذا ♥ الروح ♥♥ said...

ممممممممممم

جايا اسلم يا خالتى

عمى بيسلم عليكى
هع هع هع
عوووووووووو

اسماء واحلام فى وجدانى said...

اربع سنين من الشقى والعذاب والدروس وشغلا مخابرات وخالتى بتسلم عليكم والمعيدين اللى عملتلهم احلى سياحة وانتى خارجة ، انتى مش سيبتى حد اللى لما عاملتى له عاهة مستديرة فى وشه حتى الدكاترة والبرشام والطرق اللى بتخبيه بيها لآ بجد انتى المفروض تبقى مراقبة بس يبقوا يقابلونى لو حد من الطلبة عرف يعمل اى حركة طبعا ما المراقب متدرب احلى تدريب ، انتى ناقصلك دورة تدربية وتبقى زعيمة عصابة على اعلى مستوى علمى بحت وبعدين ليه فى اخر التعليق بتقولى عوووووووووو يا بنتى احنا مرعوبين خلقة نياااااااااااااااو

Lady E said...

لولولولولي

الف مبروك يا انتيختي

عقبالي كلها كام يوم وأقول زيك كانت ذكريات

وحشتيني

اموااااااة

Lady E said...
This comment has been removed by the author.
-_- said...

عجبني مشروع التخرج العجيب ده

راء said...

هههههههههههه

ده انتي طلعتي ولا رأفت الهجان على سن ورمح

ايه ده يا كيكي ده انتي فعلا داخلة موسوعة جينيس من اوسع ابوابها...

باي باي يا قطة بقى ورايا مذاكرة عربيىىىىىىى هطلع بملحق ف ثانوي عام يا فرحتك بيا يا ماما

حنين الذكريات said...

الحمد لله ان سنين الضياع مرت بسرعة
عارفه ليه علشان بضيع وقتنا فى المذاكره من غير أستفاده
وأخيرا هتنضمى لصفوف العاطلين فى البلد
ربنا يوفقك وتنجحى بتفوق
ونشوفك مهندسه ولا دكتوره

شوكولاتة said...

هههههههههههههه انتي طلعتي بتدرسي في أكاديمية طيبة وطلعت انا بشتغل فيها
جامدة اوي الصدفة دي
بس ياللا مبروووووووووووك مقدما
ومتخافيش بكره هروح افتن لدكتور صديق انكم بتاخدوا دروس
نيهاهاهااااااا

Anonymous said...

مبروك مقدما ع النجاح
وياريت لو سمحتى ماتنسيش تعزمينى ع الاكلير فى كافيه كوز الدره
دمك عسل خالص
خالتى بتسلم عليكى

شوكولاتة said...

أنا رديت عليكي على الفيس تؤتؤ

had-befham said...

لسه دمك زى العسل:)

كــركــبــة دمـــاغ ㋡ said...

انا بحبك اوي
ومش لاقيه كلمة شكر اقولهالك


*******

عندي تعليق عــ الصورة اللي انتي حاطاها والطرطووور

انا لبست الطرطووور ده يوم الاحد " 13/6 " ورميناه في السمااااااا في حفل التخرج ،، هحكي اليوم ده بالتفصيل بس اما اخلص امتحاناتي

(L) (f) (K)

Anonymous said...

ثقافة الهزيمة .. حلوة يا بلدى

فى كتاب داخل مصر"Inside Egypt": أرض الفراعنة على شفا الثورة الذى صدر عام 2008 يقول كاتبه الصحفي الأنجليزي جون برادلي عن مستقبل مصر أنه على رغم من بعض النجاحات الاقتصادية ألا أن توزيعها تم على من أرتبطوا بالنظام فقط دون أن يصل ذلك لباقي الشعب مما أدى"زيادة الحنق" بين المصريين. ويشير الكاتب إلى رؤيته في زياراته المتكررة لمصر كيف مثلا أن عدة ملايين من الثروة المصرية تنفق لأنشاء المصارف وتقديم المياه للقرى السياحية والفنادق الفاخرة التي يستخدمها السياح الأجانب والأغنياء المصريون فقط "في حين يموت الألاف المصريين كل عام نتيجة تلوث المياه التي تصل لهم"...

باقى المقال ضمن مقالات ثقافة الهزيمة بالرابط التالى www.ouregypt.us

و لايفوتك زيارة صفحة من الشرق و الغرب فى نفس الرابط و به الكثير من المقالات الجيدة.

حصان المرجيحة said...

انا قلت ادخل اسلم
و اسف علي التأخير
بس لظروف خالرجة عن ارادتي
شكرا ليكي

العلم نور said...

أرجوا المساهمة في دعم الحملة لو تكرمتم

(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي أعقل مجنونة في الوجود .. ويكتبون فوقها ..

(حملة الجـسد الواحـد)

رابط المدونة

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

Anonymous said...

Simply click the image below to find the Garcinia Cambogia Extract that has the personal suggestion and stamp of praise
of Dr. With HCA, one wouldn't feel the need to overindulge and will
experience more energy. Its nutritious serving of antioxidants help the human body battle contaminants, inducing more clear skin, deceleration of the getting older
process, and in general stronger health.

My blog post ... garcinia cambogia hca reviews

Anonymous said...

This is the right web site for everyone who hopes to understand this topic.
You know so much its almost hard to argue with you (not that I really would want to…HaHa).

You definitely put a fresh spin on a subject that has been discussed
for many years. Excellent stuff, just great!

Look at my web page richard district 45a

Anonymous said...

She enjoys introducing people to the best natural products she can find and uses herself
daily. The good news is that this type of interaction will not occur.
But nothing could be further from the truth as there is a vast array of geological features
such as hills, mountains and valleys.

my blog post; Fish Oil Supplements visit this site

ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket