Sunday, December 19, 2010

هو أنا هفضحكم لمه أقول (أى)؟؟؟

Sunday, December 19, 2010
بقى المعتاد الايام دى أن الافلام (تتلطش) من قبل ماتكمل أسبوع فى السيما....للأسف (ضعفت) وأتفرجت عليه لانى معيش فى المحفظه فوق الخمسه وسبعين قرش!!! وده ميكفيش الراجل الى بيقابلنى فى السيما بأبتسامه واسعه مبالغ فيها ويقولى: كل سنه وأنتى طيبه...وأرد بكل برأه : وأنت طيب ياعمو!!(من غير تردد بتروح الابتسامه وأنا من غير تردد بديلوه الفلوس بكل ذوق!!!.............
********************
فيلم سته * سبعه**تمانيه).... بيناقش قضيه مش جديده ولا وليده اللحظه(التحرش ) ولا بلاش كلمه تحرش اصل فى ناس (بتكش )منها طب ممكن نديها رمز (الفسفوسه) الى بقت مليه وش مجتمعنا !! وبتقولك بكل بجاحه: أنا اهو أنا أهو وبتشاور على نفسها يمكن يكون عندك دم ونلاقى حل للفسفوسه دى.....لكن الفسفوسه مش لاقيه الى يلمها (ويستر )عليها لأاااااااا دى لاقيه الى يقولها فى الزر**خليكى اللهى يستر عرضك ياشيخه ماتروحى ده أنتى المتنفس بتاعنا** أه ياولاد ال ........ للأسف ماينفعش أقولكم الكلمه الى محشوره فى زورى تجاهكم دلوقتى
المشكله دلوقتى :أن الفسفوسه مابقتش فسفوسه!!! لا دى بقت (دمل) ولامؤاخذه
بقت (دمل) ولسه بنعالجها زى ماكنا( مش بنعالج) الفسفوسه كنا (بنظن )بنعالج الفسفوسه بالشكل ده:
بأننا مش واخدين بالنا منها يمكن تتكسف على دمها و(تتفقع)ولامؤاخذه لوحدها
بأننا نعيب (على البنت) لانها مش محترمه وأكيد أكيد (تأكيد معنوى)بتقول للفسفوسه: تعالى يافسفوسه فسفسينى
!!!!!شويه
بأننا نمنع البنت من الاختلاط فى المجتمع والنزول خصوصا (بليل) رغم وربنا الحاجات دى بقت ماتحصلش بليل بس لأااااااا فى ناس لسه مش مقتنعه ان الفسفوسه غيرت نشاطها وبقت هوبه تشتغل فى عز النهار دى واخده كامل العدد فى الفتره الصباحيه والضهريه وعلى خفيف بليل من باب الفسفوسه البطاله نجسه
بأننا شعب ولامؤاخذه بيحب يأخد على قفاه بس الاهم من غير ماحد يشوفوا
من غير ماتقوله عينى عينك الحق ياعم الشعب قفاك متعلم عليه
لأ هو شايف وسامع وحاسس كويس أوى انه متعلم عليه
وبدل مايثور فى الاتجاه الصح لأ يركن شويه (على مؤنث سالم) ويدخلك فى النظريه الشهيره (أصلك) أصلك أنتى لو ماشيه صح ولابسه صح مكنش حد جه جانبك أصلك لو محجبه أصلك لو بتلبسى واسع اصلك..... لاثوانى بقى ثوانى
أرد عليك انت ياعم الحاج ياصاحب النظريه الشهريه هو انت اصلا فى الاساس بتقسم البنات ليه فى التحرش بمحجبه أوغير هى هتفرق ياعم الحاج ولا ايه؟؟!!! وربنا ضحكتنى هى الفسفوسه بتفرق معاها برضه الحاجات دى!! ولو قلنا ماشى فى قله مندسه من مؤنث سالم بتلبس لبس أوفر أوفر ياكبير
طب ممكن سؤال معلش: طب ليه فى اطفال فى عمر الزهور الفسفوسه بتيجى جانبهم اصلااااا
ايوه معلش نسييييييييييت عشان برضه بيلبسوا أوفر أوفر ياكبير
وحياه الغاااااااااليه اياك ترد على السؤال بتاع مؤنث سالم سبلى انا الطالعه دى
هو انا هفضحكم لمه اقول أى؟؟
ايوه هتفضحيناااااااااااااااااااااااااااااااااااااااااااااااااااااااااااااااااا
وجبتلنا العاااااااااار اللهى تتوكسى يابعيده مين قالك: تنزلى فى عز الضهر وانتى لابسه الدولاب وتجيبى كيلو لبن؟؟
ولانازله الشغل ولا المدرسه ولا اوعى تقوليها فى وشى نازله تشوفى صاحبتك وتتفسحى كمان
لا ده انتى بجحه اوى وتستاهلى كل الفسفيس تيجئ جانبك كمان
وهنروح نحجزلك فى قسم (الوبا ) مع هنادى
************************
عزيزتى حواء: لو اى فسفوسه جت جانبك او عدت من قدامك لازم لازم تفرقعيها ولو معرفتيش و(خوفتى) من مجتمع زباله
على الاقل طيب قولى كلمه أبيحه؟؟
!!!!!!!!!
(لنا الله ) عزيزتى حواء لنا الله


11 comments:

Tears said...

الحل فى القانون الرادع و تفعيل هذا القانون مثل ما هو حادث فى دول كثيره شوارعها آمنه

Ramy said...

مع تيرز بعد تفكير عميييق

جامدة يا كيكى

و لسه بأضحك اهوا (:

إنسان || Human said...

هههههههه واضح انت متنرفزة قوي
عموماً هي حاجة تنرفز ...وظاهرة حديثة على مجتمعنا ...يعني ما اظنش في الأربيعينات او حت الثمانينات اصبحت بالشكل اللي موجود دلوقتي ..وده بيوضح لنا ان في حاجات جديدة بتحص لمجتمعنا واحنا مش داريين
...
القانون للأسف مش الحل اللي هايحل كل حاجة ...القانون اعتقد ان هو عامل زي مسكن ..حل ممكن يكون وقتي..لكن الحل في عودة الاخلاق والاصلاح الشامل وعودة الدين الصحيح السليم

همس الاحباب said...

مع الاسف ظاهرة منتشرة فى شوارعنا وبتتزايد فى السنوات الاخيرة ربما كانت فى الماضى تنحصر على فئة من الشباب والبنات لكن الان اصبحت ظاهرة خطيرة وتفشت فى المجتمع المصرى بدون اى تفريق بين ماهو تبرج او حجاب او نقاب الكل سواء
مشكلة واسبابها كثيرة جدا وعلاجها يحتاج الى تدخل جراحى وبتر عاجل
متفق معكى قلبا وقالبا
تحياتى

Anonymous said...

الواحد زهق من الكلام و بعدين لو القانون منفعش
اكيد لازم كل واحدة صابتها الفسفوسة تتكلم
و تستعمل السلاح المصرى الرادع (الشبشب)

Maram said...

المشكلة أن الفسافيس بقت كبير وصغير وبتطلع في أماكن ومواقف غريبه ... عقول مريضة..ولو مفيش كريم محترم يلمها ... نرش عليها شوية ملح علشان تفرقع ..احيانا في مواضيح تحتاج القسوة

Humman being said...

ازيك يا كيكى وحشتينى ....
حلو البوست بس ليه مفيهوش حل؟؟

بقالى يومين بدخل كل المدونات علشات ألاقى حل سريع وجزرى ... كتير قالوا "القانون" ... طب مفيش حل تانى حل بديل؟؟؟؟

كل سنة وانتى طيبة

فراشة said...

عندك حق جدا جدا جدا

بس يا خوفي حتى (الدمل ) دا يقلب لمرض جلدي متفشي

ربنا يستر

والحلول بتيجي من حلول الأسباب اللي وراء الفسفوسه دي
وحكومتنا (اللي مبقتش عزيزة ) معندهاش وقت للشعب (اللي مبقاش غلبان بس لا بقى عدمان كمان ) هتقولك وأنا مالي كل واحد وفسفوسته

ولو سألتي حد حصلك (فسفوسه ) هيقولك بكل صراحى وكبرياء
لا

وتقريبا هنكرر فيلم النوم ف العسل

مدونة عرفة فاروق said...

كيكي
انتى عارفة الحل الوحيد ايه
قنبلة نووية تيجى تاخد مصر باللى فيها من ضمنهم انا ما عداكم طبعا
وبعد كدة ييجوا المهاجريين يعملوا مصر جديدة
للاسف لينا تلت اجيال فى مصر مطلعناش منهم نفر واحد عدل
ربنا يرحم

bastokka طهقانة said...

مازلت شايفة ان البنت او الست- اللي لابسة محترم و مش عاملة فرح في وشها و ماشية في حالها لا بتضحك ضحكة رقيعة و لا ماشية في شارع ضلمة في وقت متاخر-
في مأمن من التحرشات

دعاء مواجهات said...

اية يابت المواضيع الجامدة اللى بتلكلكى فيها دى

د احنا بقينا جامدين بقى وكمان بندى نصايح وبنحرض الناااس ..

ولانسيتك فى يوم

ولانسيتك فى يوم
ياااااارب أرحمنى
 
عوووووfokaak meny © 2008. Design by Pocket