خبر عاااااااجل: (الموساد) تعلن مسئوليتها عن صلاه الجمعه .........

وأنا أقول (مستهيلى )سامعه الله أكبر بطريقه مختلفهّ !!!
طلعت الموساد كلها بتصلى عندنا الجمعه
ااااه يا ولاد الايه ياعفااااااااااااريت

♥ ♥I like the Mossad ♥

حلة

المشكله الى (هتخلينى)ألبس الحلة على نفوخى وأجرى فى الشارع:
: أنى فاهمه لحد دلوقتى الناس قاعده فى التحرير ليه؟
:أنى فاهمه الناس فى البيت بتشتمهم وبتشوهم ليه؟
أنى فاهمه لو ال(80)مليون عملوا (عجينه الفلاحه) فى التحرير لبابا حسنى مش هيمشى؟

:أنى فاهمه أن فى وسط كل ده فى بلد بتنهار؟
:أنى بحاول (أقرب وجهات النظر) ببعض بلاقى (نفس البصه) والأسقاطات
...أقولكم حاجه أمسحونى قبل ما أمسحكم

♥

♥ ♥

أصل ده بقى شعار المرحله!!!!! عن أذنكم أنا رايحه ألبس الحلة

5/2/2011

المحروسة مابقتش محروسة

:
25 يناير
:الشعب المصرى يعبر عن غضبه ضد النظام الحاكم ويطلب
تنحى الرئيس مبارك
حل مجلس الشعب والشورى
حكومه أنتقاليه
لجنه تأسيسيه لتغير الدستور
الداخليه فى بدايه الامر(تحاول)أن تظهر بشكل مختلف أمام كاميرات التلفزيون بمحاصره المتظاهرين فقط لكن تفشل (المحاوله)فشلا ذريعا وبدأت تكشر عن أنيابها:سقوط ضحايا ومصابين وأعتقالات واسعه
الغريب التى لم (تعتاده) الداخليه هو :ثبات المتظاهرين على مواقفهم وعدم أخافتهم بعدد الضحايا والمصابين بل زادو أصرار وعددا
فى نهايه ليله الثلاثاء25 تحاول (جاهده) الداخليه فى عدم أبقاءهم فى ميدان التحرير
والمتظاهرين يحاولون(جاهدين) الابقاء فى ميدان التحرير
:
26يناير
الداخليه (تتوعد) المتظاهرون
المتظاهرون(تتوعد) الداخليه
مع فارق القوه بينهم
شريحه كبيره من الشعب المصرى تراقب مايحدث فى البيت وعلى شاشات التلفزيون(العربيه) منهم: من يريد المشاركه فى ثوره الغضب ولكن فى ذهنه(العين الحمرا للداخليه)فيشعر بالغضب والسخط على نفسه فيبقى ساكنا
ومنهم لايفهم مايحدث ويباشر حياته طبيعى
فى نهايه ليله الاربعاء 26 يسود المشهد تعتيم أعلامى مصرى
:
27 يناير
تنقلب الموازين تمام
البورصه تنهار
قطع خدمات الأنترنت والتليفون المحمول
وأختفاء رجال الشرطه من جميع محافظات مصر
المحروسه (مابقتش محروسه) بلاخدمات بلا رجال شرطه
أحتراق جميع أقسام الشرطه ومكاتب الحزب الوطنى
بسبب (الأحتقان)تجاهم
فى نهايه ليله الخميس 27 (المحروسه)تسرق وتحترق
:
28يناير جمعه الغضب
التلفزيون المصرى بعد ماخرج من سبات عميق يحاول تهدئه المواطنين
والجزيره:تعلن عن هروب المسجاين
العامل الزمنى يفرق كثيرا مع المتظاهرين والمواطنين لعدم ظهور أحد من المسئولين ليتحدث
يتحدث صفوت الشريف ولكن دون فائده
التلفزيون المصرى يعلن(أخيرا) عن خطاب السيد الرئيس:أقال الحكومه السابقا
أمر بتشكيل حكومه جديده برئاسه أحمد شفيق
ندد بالسرقه والسلب
*نزول الجيش المصرى ميدان التحرير وبدايه حظر التجوال
*جميع السفارات تطالب رعايها من الخروج من مصر حتى سفاره العراق
فى نهايه ليله الجمعه 28 المحروسه( تستغيث) من كل: شرطى فاسد ومجرم وهناك من أشترك معهم الذين يمتلكون النفوس الضعيفه فى ترويع الأمنين
المواطنون يشكلون لجان شعبيه بالاسلحه البيضا
:
30و31
يناير
وتستمر المهازل الاخلاقيه فى الهجوم على المستشفيات والبنوك والبيوت ومحاوله سرقه المتحف المصرى
مع عدم رضاء لخطاب الرئيس الاول و تستمر المظاهرات
اللجان الشعبيه تحاول (جاهده) تنظيم المرور والقبض على الهاربين وعدم أستغلال البعض للأزمه
عدم التصريح لقناه الجزيره للبث فى مصر وغلق مكتبها فى القاهره وسحب التراخيص
الجزيره (**ترد** )بأذاعه فيلم تسجيلى وراء الشمس لتعذيب جهاز الشرطه للمواطنين
لزياده الأحتقان بين الشرطه والمواطنين
ونشر أخبار تزيد الأحتقان أكثر وأكثر
أسرائيل تعزز قواتها على الحدود المصريه
عوده خدمات المحمول
*شراء المواطنون السلع الأساسيه بكميات مبالغ فيها ونقص حاد فى السلع الأساسيه فى بعض المحافظات
فى نهايه أيام 30و31 الأحتقان يتزايد والكل ينكل بأحمد عز ودعوه لمظاهره مليونيه
والمحروسه مازالت تستغيث
:
1فبراير
عوده خدمه الأنترنت
المظاهره المليونيه
البرادعى: يرفض الحوار مع نائب الرئيس حتى رحيل مبارك وفى نفس الليله يقابل السفيره الاميركيه بالقاهره
خطاب الرئيس الثانى(الذى لو كان أول خطاب لكانت الأمور أهدء الأن) العامل الزمنى فى ظل تلك الأمور هو الورقه الرابحه
الرئيس يعلن عن: عدم ترشحه لفتره رئاسيه أخرى
تعديل الماده76و77 المتعلقه بمده الرئاسه وترشيح الرئيس
الملاحقه بالخارجين عن القانون
تنفيذ الاحكام القضائيه الخاصه ببطلان الانتخابات فى بعض الدواير
الخطاب أدى ألى أنقسام المواطنين أكثر وأكثر
الى:هناك من أبكهم خطاب الريس ولقبه بالأب وحقن أحتقانه تجاه الشباب فى التحرير ويتسألون:
ماذا يردون أكثر؟؟
هناك من أرتضى بخطاب الريس ورحل من التحرير
هناك من ظل فى التحرير رافض الخطاب وندد برحيله والأن
نهايه 1 فبراير الأنقسامات تتزايد بين المواطنين
:
2 فبراير(اليوم الأسود) على الاطلاق
مظاهرات تأيد للريس مبارك فى جميع المحافظات
ودخول المتظاهرين المؤيدين الى ميدان التحرير وبدأت المجزره
ورغم انه معروف ستحدث أشتباكات بين الأثنين اذا وصل طرف للأخر
الا أن الجيش لم يفعل أحتياطه لتأمين ميدان التحرير وعدم دخول مؤيدين للريس مبارك
نهايه يوم2 فبراير تتزايد الأحتقانات ضد الشباب المتظاهرين وتحميله مسئوليه المجزره
الشباب المتظاهرين يتزيدون أحتقان ضد بلطجيه الحزب الوطنى وضد اى مواطن يرفض تظاهرتهم ويحملون مبارك المسئوليه كامله على ماحدث وسوف يحدث
:
3 فبراير
حوار أحمد شفيق مع 11 حزب من المعارضه
النائب العام يأمر بمنع سفر أحمد عز حبيب العادلى والجرانة والمغربى وتجميد ارصدتهم فى البنوك
نائب الرئيس عمر سليمان يعلن حواره مع المعارضه البعض يرفض الحواره معه لكنه خطابه لم يكن يتسم بالذكاء الكافى لتهدئه الجو العام
:
البعض يدعو غدا لجمعه الرحيل وتحمل مبارك كل ماحدث ومحاكمته
البعض يدعو لجمعه السلام والاستقرار ويكفى ماحدث من أنهيارات أقتصاديه وأخلاقيه وان مبارك اذا لم يذهب غدا فهو ذاهب ذااااااااااااهب
البعض متخوف من عدم فض المظاهرات فى التحرير معللين:هل لو تنحى مبارك الأن هل سيرحلون من التحرير أم ستستمر المظاهرات حتى محاكمه مبارك أو ضد عمر سليمان كرئيس حالى بعد مبارك...وهل لو لم يتنحى مبارك ولم يرحلوا المتظاهرون من ميدان التحرير
هل ستنزف المحروسه كل هذا النزيف؟
*أنا لم أبكى من خطاب الرئيس ولم أتأثر به
و أحمل مبارك كل ماحدث حتى الأن ولا أقول تلك الكلمه العقيمه: تذكروا له
أنه صاحب الضربه الجويه!!!ولا أريدك أيها القارئ أن تتأثر بوجهه نظرى
ولاتجادلنى ليس لأنى أخشى الحوار مع أحد ولكن قبل ان تكتب:
وتشحن نفسك ضدى وتتراشق لى بالأتهامات بأنى مغيبه هبله ساذجه
وأنى أزاى مش شايفه الى بيحصل؟؟ وأنه فرد قدام شعب ولازم يتنحى
من فضلك عزيزى القارئ: فكر هل تستحق (المحروسه) كل مايحدث
أنا لايهمنى من السبب الأن هل هو مبارك أو المتظاهرين بميدان التحرير
أنا أنظر وأبكى الأن على وطن يتمزق
ننقسم بين أنفسنا
أصبحنا فئات عزيزى القارئ
ولايوجد صوت (عقل) واحد
يريد حل وسط الأن؟؟
!!!!!!
نهايه يوم 3 فبراير (بالنسبالى) الكل فى وادى ولا أحد يستمع لصوت العقل
العند مسيطر على الطرفين الكل يتراشق بالاتهامات لايريد احد الأنسحاب الا على (جثه) الثانى
مازلت المحروسة (تنزف) وانا أتمزق داخليا

لايافرج

الشعب التونسى: ايه

الشعب المصرى:ايه ...ايه

الشعب التونسى: انت اهبل ولا ايه أنا عملتها!!

الشعب المصرى بيبص للشعب التونسى بنظره شكه وريبه ويبعد خطوتان لورا:ويردد بطريقه بلهاء عملتها

!!!!!

الشعب التونسى: انت مش واخد بالك ولا ايه!!أنت مش ناوى تعملها ولا ايه

الشعب المصرى بكل ثقه وفخر: لا انا أطهرت من بدرى

الشعب التونسى:!!أنا بكلمك عن التحرير

الشعب المصر ى مقاطع الشعب التونسى: ااااااه ممكن تركب المترو او اى أتوبيس هيوديك على هناك على طول

الشعب التونسى: بس أحنا طريقنا مكنش فى مواصلات كنا أحنا المواصله

الشعب المصرى يسخر بداخله من الشعب التونسى:ان شاء الله هنركب أول توك تك وهنجيلكم

الشعب التونسى يقترب من الشعب المصرى ويحط أيده على كتفه

الشعب المصرى ينتفض بمجرد وضع يد الشعب التونسى عليه ويتذكر مشهد لفيلم الكرنك الشهير عند اغتصاب فرج لسعاد حسنى

الشعب التونسى مقترب هامسا

الشعب المصرى فى وضع استعداد ليصرخ ويقول بأعلى حس لا يافرج لايا فرج

الشعب التونسى: بس عمرك ماهتوصل مادام مستنى مواصله

وقبل ان يذهب الشعب التونسى رمق الشعب المصرى بنظره( لم تتحد هويتها الى الان) هل هى نظره أمل أم نظره ملئ بالخيبه

ومازال الشعب المصرى

مستعد ليصرخ ويقول: بأعلى حس لا يافرج لايا فرج

لسه قادر على الفراق!!!!

عارف والله العظيم قبل ما أكتب الموضوع حاسة ان قلبى هيحصله حاجة بمجرد بس التفكير فيك

أنا مش عارفة أقولك ايه !! ولاعمرى اصلا تخيلت أن ممكن يكون بعدك عنى مأثر فيا للدرجة دى أنا كنت واخدة الموضوع عاااااادى جداااا بس الظاهر كنت معتوهة اه والله معتوهة أصلك ماتعرفش الناس وحشة قد ايه هنا مابيصدقوا بس أتنين يبعدوا عن بعض…أنت أصلك ماتعرفش مقدااااااار التريقة اللى باخدها كل يوم

عااااااارف يا حرف السين………ياما نفسى أنطقك زى ما باكتبك كده

بمجرد مايكتشفوا أنك بعيد عنى ما اقدرش أقولك كوكتيل الاغانى الى بينزلى مرورا بأغنية-ثكر حلوة الدنيا ثكر وأنتهاء بأن العيال فى الحتة بيثبتونى ومش بيرضوا يمشونى الا لما أقول قميث نفيثة نسف ولامنسفسى!!

وكماااان يشاء القدر ان والله تطلع اغنيتى المفضلة من بين الاغانى ياربى …بت يانوثه يانوثه سايله البثوثه والله وكبرتى وحيلتى وبقيتى عروثه وأحب اطول اوى فى بثثثثثثثبوثه ….وطبعا الاغنية دى بأغنيها سيلنت من جوايا بس

أنت عارف انت قاسى أوى .. اه والله طب الى يمشى ده يمشى لوحده مش يأخد معاه الصاد والزين او حرف الذال أصل الحرفين نطقهم عندى واحد و الثاء ….وعاهة مستديمة فى حرف الشين!!! رشتهم بايه قولى ولا وعدتهم بايه وخليت مخدتش ليييييييييه بقيت الحروف بالمرة !! وسبتنى أشاور .. أكيد زمانكم بره دلوقتى والبليه لعبت معاكم

طب أبعتولى باسبور اجيلكم !!

تعالوا شوفوا أخوتكم بيسألوا عليكم كل شوية والله بيقولوا: فين اخوتنا نفسنا ننطق جملة صح بقى!!!! ياجدعان عيب عليكم والله لما تيجى سيرتكم فى الكلام اكل الكلام

أمبارح نزلت اجيب فرشة اسنان باقول للراجل : لو سمحت عايزة فرشاااااااااه تلاقونى بطلع هواء فى حرف الشين قالى عايزاها نوعها ايه؟؟وللاسف كنت عايزها الى هى الحساسة دى وبعيد عنكم سألنى السؤال وفضلت متنحة قالى ايوه عايزها ايه؟؟ ومازال صمتى الرهيب مستمر يا أنسة باكلمك .. أنا روحت محركة شفايفى من غير ما انطق قالى ايييييه روحت قالت له ممكن ورقة وكتبتها له رااااااح بص لى بصة عمرى ماهنساها وراحت الدمعة فرت من عينى

طب اعمل ايه طيب أروح ملجأ أيتام الحروف؟ أروح أتبنى حرف لسه هاكبر بقى وأغيرالكفولة كل شوية وأقول بس ياواد بس يابت وأدفع دروس خصوصية وفى الاخر أكيد هيعمل زيك .. هيهرب مع اى حرف مش كويس

وأضيع انا للمره التانية !!! وأتفرج على مسلسل سنوات الضياع وأتقهر أكتر واأكتر

ااااااااااه ياااما طيب لو كان كلامى معاك حاد شوية طيب والله انا اسفة أصل بجد مفيش حلول بديلة غير أنك ترجع لى بجد فراقك صعب عليا اوى الناس فى مصر وحشين اوى

طب بص انا هديلك فرصة تفكر وراجع نفسك و وحياة أبوك ياشيخ خليك حقانى ولو جيت ماتخفش هدفع لك انا تذكرة الرجوع وأوعى ياقلبى تيجى فى عبارة لاحسن أفتقدك للابد

وأحب أهديلك اغنية لشيرين :

مش عايزة غيرك انت .. والله بحبك انت

والحب كله انت .. وانت الناس كلها

وسنين عمرى الى راحوا .. قلبى عاشها فى جراحه

وان شاء الله لما ترجع هاكمل المقطع الاخير من الاغنيه : كااااانت ناقصانى حاجة ومعاك كملتهااااا

**********************

على مجله الكرمه أضرب من غير تفكير

هو أنا هفضحكم لمه أقول (أى)؟؟؟

بقى المعتاد الايام دى أن الافلام (تتلطش) من قبل ماتكمل أسبوع فى السيما....للأسف (ضعفت) وأتفرجت عليه لانى معيش فى المحفظه فوق الخمسه وسبعين قرش!!! وده ميكفيش الراجل الى بيقابلنى فى السيما بأبتسامه واسعه مبالغ فيها ويقولى: كل سنه وأنتى طيبه...وأرد بكل برأه : وأنت طيب ياعمو!!(من غير تردد بتروح الابتسامه وأنا من غير تردد بديلوه الفلوس بكل ذوق!!!.............
********************
فيلم سته * سبعه**تمانيه).... بيناقش قضيه مش جديده ولا وليده اللحظه(التحرش ) ولا بلاش كلمه تحرش اصل فى ناس (بتكش )منها طب ممكن نديها رمز (الفسفوسه) الى بقت مليه وش مجتمعنا !! وبتقولك بكل بجاحه: أنا اهو أنا أهو وبتشاور على نفسها يمكن يكون عندك دم ونلاقى حل للفسفوسه دى.....لكن الفسفوسه مش لاقيه الى يلمها (ويستر )عليها لأاااااااا دى لاقيه الى يقولها فى الزر**خليكى اللهى يستر عرضك ياشيخه ماتروحى ده أنتى المتنفس بتاعنا** أه ياولاد ال ........ للأسف ماينفعش أقولكم الكلمه الى محشوره فى زورى تجاهكم دلوقتى
المشكله دلوقتى :أن الفسفوسه مابقتش فسفوسه!!! لا دى بقت (دمل) ولامؤاخذه
بقت (دمل) ولسه بنعالجها زى ماكنا( مش بنعالج) الفسفوسه كنا (بنظن )بنعالج الفسفوسه بالشكل ده:
بأننا مش واخدين بالنا منها يمكن تتكسف على دمها و(تتفقع)ولامؤاخذه لوحدها
بأننا نعيب (على البنت) لانها مش محترمه وأكيد أكيد (تأكيد معنوى)بتقول للفسفوسه: تعالى يافسفوسه فسفسينى
!!!!!شويه
بأننا نمنع البنت من الاختلاط فى المجتمع والنزول خصوصا (بليل) رغم وربنا الحاجات دى بقت ماتحصلش بليل بس لأااااااا فى ناس لسه مش مقتنعه ان الفسفوسه غيرت نشاطها وبقت هوبه تشتغل فى عز النهار دى واخده كامل العدد فى الفتره الصباحيه والضهريه وعلى خفيف بليل من باب الفسفوسه البطاله نجسه
بأننا شعب ولامؤاخذه بيحب يأخد على قفاه بس الاهم من غير ماحد يشوفوا
من غير ماتقوله عينى عينك الحق ياعم الشعب قفاك متعلم عليه
لأ هو شايف وسامع وحاسس كويس أوى انه متعلم عليه
وبدل مايثور فى الاتجاه الصح لأ يركن شويه (على مؤنث سالم) ويدخلك فى النظريه الشهيره (أصلك) أصلك أنتى لو ماشيه صح ولابسه صح مكنش حد جه جانبك أصلك لو محجبه أصلك لو بتلبسى واسع اصلك..... لاثوانى بقى ثوانى
أرد عليك انت ياعم الحاج ياصاحب النظريه الشهريه هو انت اصلا فى الاساس بتقسم البنات ليه فى التحرش بمحجبه أوغير هى هتفرق ياعم الحاج ولا ايه؟؟!!! وربنا ضحكتنى هى الفسفوسه بتفرق معاها برضه الحاجات دى!! ولو قلنا ماشى فى قله مندسه من مؤنث سالم بتلبس لبس أوفر أوفر ياكبير
طب ممكن سؤال معلش: طب ليه فى اطفال فى عمر الزهور الفسفوسه بتيجى جانبهم اصلااااا
ايوه معلش نسييييييييييت عشان برضه بيلبسوا أوفر أوفر ياكبير
وحياه الغاااااااااليه اياك ترد على السؤال بتاع مؤنث سالم سبلى انا الطالعه دى
هو انا هفضحكم لمه اقول أى؟؟
ايوه هتفضحيناااااااااااااااااااااااااااااااااااااااااااااااااااااااااااااااااا
وجبتلنا العاااااااااار اللهى تتوكسى يابعيده مين قالك: تنزلى فى عز الضهر وانتى لابسه الدولاب وتجيبى كيلو لبن؟؟
ولانازله الشغل ولا المدرسه ولا اوعى تقوليها فى وشى نازله تشوفى صاحبتك وتتفسحى كمان
لا ده انتى بجحه اوى وتستاهلى كل الفسفيس تيجئ جانبك كمان
وهنروح نحجزلك فى قسم (الوبا ) مع هنادى
************************
عزيزتى حواء: لو اى فسفوسه جت جانبك او عدت من قدامك لازم لازم تفرقعيها ولو معرفتيش و(خوفتى) من مجتمع زباله
على الاقل طيب قولى كلمه أبيحه؟؟
!!!!!!!!!
(لنا الله ) عزيزتى حواء لنا الله

تاتا...من اخويا شريف

تاتا.... خطى العتبه
تاتا...... حبة حبة
تاتا .....القلب بريء
تاتا.... والضي صديق
تاتا ....عدي الأحزان
تاتا..... بشراع ألوان
تاتا.... الصبر سفينة
تاتا..... وإيماننا مالينا
تاتا..... نزرع بساتين
تاتا..... فل وياسمين
تاتا..... نكتب ع السور
تاتا..... بحروف من نور
تاتا ....ونغني كمان
تاتا .....كاريمان كاريمان
تاتا.... ولا حزن يصيبني
تاتا.... لأ فكك مني
تاتا.... الضحك ناسيكي ؟
تاتا.... راح أجيبلك كيكي
سكر شربات
كيكي
دي زبادي خلاط
كيكي
حلوة وأمورة
كيكي
خف العصفورة
كيكي
بنوتة رقيقة
كيكي
حالة الفابريقة
كيكي
إجرام تدوين
كيكي
من ست سنين
كيكي
قرصان الفيس
كيكي
شي سبيشيال كيس
كيكي
ده ال عوووو بذاته
كيكي
ساب لها شنباته
كيكي
لو محتاج فيزا
كيكي
دي سفيرة الجيزة
كيكي
صعيديه أصيله
كيكى
من أرقى فصيله
كيكى
شطورة مش لمضة
كيكي
وتعيش ع الكبدة
كيكي
كلا وبتاتا
كيكي
تنسى الشيكولاته
كيكي
ومعاها مؤهل
كيكي
إسألها تفنجل
كيكي
كلها حركات
كيكي
تغلب بركات
كيكي
أجدع شيخ حارة
كيكي
وتتوه بجدارة
كيكي
جاسوسة وطنية
كيكي
سرها أغنية
كيكي
تاكل الأيتام
كيكي
ف البؤجة تنام
كيكي
عيني ع اللقاءات
كيكي
بطة نشاطات
كيكي
الله يخليكي
كيكي
ويبارك فيكي
كيكي
عودي للتدوين
كيكي
باك ليفت يمين
كيكي
ارجعي لبلوجرك
كيكي
وخديه على حجرك

*************
مش لاقيه كلام غير شكرااااااااااااااااا
لانك لسه بتثبتلى ان فى ناس لسه ( نضيفه) فى الدنيا دى
شكرااااااااااااااااااا
لاننا لقينا بعض بعد ماتوهنا انا وانت من قدام عربيه الكبده
شكرااااااااااااااااااااااااااا
لانك رجعتلى ضحكه قلبى تانى
شكرااااااااااااااااااااااا
لاننا اخوات بجد
ملحوظه: الكلام ده ملوش علاقه نوهائى بالقصيده دى
اه وربنا
***************
محدش بقى معاه منديل
!!!!!!